![പ്രിയങ്ക ഗാന്ധി റായ്ബെറേലിയിൽ ഇറങ്ങുമോ?; കോൺഗ്രസിൻ്റെ മൂന്നാംഘട്ട സ്ഥാനാർത്ഥി പട്ടിക ഇന്ന്](http://media.assettype.com/reporterlive%2F2023-08%2Fb4b47549-c0df-48b9-a8c1-165aaf450316%2FNew_Project__19_.jpg?w=480&auto=format%2Ccompress&fit=max)
ന്യൂഡൽഹി: കോൺഗ്രസിന്റെ മൂന്നാംഘട്ട സ്ഥാനാർത്ഥി പട്ടിക ഇന്നുണ്ടായേക്കും. റായ്ബെറേലിയിൽ നിന്ന് പ്രിയങ്ക ഗാന്ധിയുടെയും അമേഠിയിൽ നിന്നും രാഹുൽ ഗാന്ധിയുടെ പേരുകൾ മൂന്നാംഘട്ട പട്ടികയിൽ ഇടംപിടിക്കുമോ എന്നതും രാഷ്ട്രീയ കേന്ദ്രങ്ങൾ ഉറ്റുനോക്കുന്നുണ്ട്. പ്രധാനമായും കർണാടക, പശ്ചിമ ബംഗാൾ, അരുണാചൽ പ്രദേശ്, സിക്കിം, തെലങ്കാന സംസ്ഥാനങ്ങളിലെ സ്ഥാനാർത്ഥി പട്ടികയ്ക്കാണ് കോൺഗ്രസ് കേന്ദ്ര തിരഞ്ഞെടുപ്പ് സമിതി രൂപം നൽകിയിരിക്കുന്നത്.
കർണാടകയിലെ ഗുൽബർഗിൽ നിന്ന് ഖർഗെയുടെ മരുമകൻ രാധാകൃഷ്ണൻ ഡി മത്സരിക്കും. 2009, 2014, 2019 ലോക്സഭാ തിരഞ്ഞെടുപ്പുകളിൽ ഗുൽബർഗിൽ നിന്നാണ് ഖർഗെ മത്സരിച്ചത്. ബംഗാളിൽ കോൺഗ്രസ് മത്സരിക്കുന്ന 12 സീറ്റുകളിലെ സ്ഥാനാർത്ഥികളെയും ഇന്ന് തന്നെ പ്രഖ്യാപിക്കുമെന്നാണ് റിപ്പോർട്ടുകൾ. നേരത്തെ ഇടത്-കോണ്ഗ്രസ്- ഇന്ത്യന് സെക്കുലര് ഫ്രണ്ട് (ഐഎസ്എഫ്) സഖ്യത്തിൻ്റെ സീറ്റ് ധാരണ പ്രകാരം കോൺഗ്രസിന് ബംഗാളിൽ 12 സീറ്റാണ് അനുവദിച്ചിരിക്കുന്നത്. പിസിസി അധ്യക്ഷൻ അധിർ രഞ്ജൻ ചൗധരി പശ്ചിമ ബംഗാളിലെ ബഹറംപൂരിൽ നിന്ന് മത്സരിക്കും. രാജസ്ഥാൻ , മധ്യപ്രദേശ്, മഹാരാഷ്ട്ര അടക്കമുള്ള സംസ്ഥാനങ്ങളിലെ സ്ഥാനാർത്ഥി നിർണയ ചർച്ചകൾ ഇന്ന് നടന്നേക്കും. രണ്ട് ഘട്ടങ്ങളിലായി 82 സ്ഥാനാർത്ഥികളെയാണ് കോൺഗ്രസ് ഇതുവരെ പ്രഖ്യാപിച്ചത്. ആദ്യഘട്ടത്തില് 39 സീറ്റുകളിലേയ്ക്കും രണ്ടാം ഘട്ടത്തില് 34 സീറ്റുകളിലേയ്ക്കുമാണ് കോണ്ഗ്രസ് സ്ഥാനാര്ത്ഥികളെ പ്രഖ്യാപിച്ചിരുന്നത്.
കേരളത്തിൽ മത്സരിക്കുന്ന16 മണ്ഡലത്തിലെ സ്ഥാനാർത്ഥികൾ ഉൾപ്പെടെയായിരുന്നു കോൺഗ്രസ് ആദ്യഘട്ടത്തിൽ 39 സ്ഥാനാർത്ഥികളെ പ്രഖ്യാപിച്ചത്. ചത്തീസ്ഗഡ്, കര്ണാടക, കേരളം, മേഘാലയ, നാഗാലാന്ഡ്, സിക്കിം, തെലങ്കാന സംസ്ഥാനങ്ങളിലെ 39 സീറ്റുകളിലെ സ്ഥാനാര്ത്ഥികൾ ആദ്യഘട്ട പട്ടികയിൽ ഇടംപിടിച്ചിരുന്നു. കേരളത്തിൽ രാഹുൽ ഗാന്ധി, എഐസിസി ജനറൽ സെക്രട്ടറി കെ സി വേണുഗോപാൽ, ചത്തീസ്ഗഡിൽ മുൻമുഖ്യമന്ത്രി ഭൂപേഷ് ബാഗൽ, കർണാടകയിൽ ഡി കെ ശിവകുമാറിൻ്റെ സഹോദരൻ ഡി കെ സുരേഷ് തുടങ്ങിയ പ്രമുഖർ ആദ്യഘട്ട പട്ടികയിൽ ഇടംപിടിച്ചിരുന്നു.
രണ്ടാം ഘട്ട സ്ഥാനാർത്ഥി പട്ടികയിൽ അസം, മധ്യപ്രദേശ്, രാജസ്ഥാൻ എന്നീ സംസ്ഥാനങ്ങളിൽ നിന്നുള്ള 43 സ്ഥാനാർത്ഥികളാണ് ഇടംപിടിച്ചിരുന്നത്. മുൻ മധ്യപ്രദേശ് മുഖ്യമന്ത്രി കമൽനാഥിൻ്റെ മകൻ നകുൽ നാഥ് സിറ്റിങ്ങ് സീറ്റായ മധ്യപ്രദേശിലെ ചിന്ദ്വാരയിലും രാജസ്ഥാൻ മുൻ മുഖ്യമന്ത്രി അശോക് ഗെഹ്ലോട്ടിൻ്റെ മകൻ വൈഭവ് ഗെഹ്ലോട്ട് രാജസ്ഥാനിലെ ജലോറിൽ നിന്നും പട്ടികയൽ ഇടംപിടിച്ചിരുന്നു. രാജസ്ഥാൻ 10, അസം 13, മധ്യപ്രദേശ് 10, ഉത്തരാഖണ്ഡ് 3, ഗുജറാത്ത് 7, ദാമൻ ദ്യു 1 എന്നിങ്ങനെ അഞ്ച് സംസ്ഥാനങ്ങളിലെയും ഒരു കേന്ദ്രഭരണ പ്രദേശത്തെയും സ്ഥാനാർത്ഥികളുടെ പട്ടികയാണ് രണ്ടാംഘട്ടത്തിൽ കോൺഗ്രസ് പുറത്തിറക്കിയത്.