![ലോക്സഭാ വോട്ടെടുപ്പ് കഴിഞ്ഞു; കെജ്രിവാള് തിരികെ ജയിലിലേക്ക്](http://media.assettype.com/reporterlive%2F2024-06%2Ff03845ac-2ea3-448c-9591-b14e43dccb72%2Fkejriwal__2_.jpg?w=480&auto=format%2Ccompress&fit=max)
ന്യൂഡൽഹി: സുപ്രീംകോടതി അനുവദിച്ച ഇടക്കാല ജാമ്യ കാലാവധി അവസാനിച്ചതോടെ ഡൽഹി മുഖ്യമന്ത്രി അരവിന്ദ് കെജ്രിവാൾ ഇന്ന് തിരികെ ജയിലിലേക്ക് മടങ്ങും. ഇന്ന് ഉച്ചതിരിഞ്ഞ് മൂന്ന് മണിയ്ക്ക് തിരികെ തിഹാർ ജയിലിലേക്ക് മടങ്ങുമെന്നാണ് കെജ്രിവാൾ അറിയിച്ചത്. ആരോഗ്യപ്രശ്നങ്ങൾ ചൂണ്ടിക്കാട്ടി ജാമ്യ കാലാവധി നീട്ടണമെന്ന് ആവശ്യപ്പെട്ടിരുന്നെങ്കിലും പരിഗണിക്കാൻ സുപ്രീം കോടതി വിസമ്മതിച്ചിരുന്നു. ഇടക്കാല ജാമ്യം നീട്ടണമെന്ന് ആവശ്യപ്പെട്ടുള്ള ഹർജിയിൽ വിധി ഈ മാസം അഞ്ചിലേക്ക് വിചാരണക്കോടതി മാറ്റി. ഇതോടെയാണ് കെജ്രിവാൾ ജയിലിലേക്ക് മടങ്ങുന്നത്.
മാർച്ച് 21ന് ഇഡി അറസ്റ്റ് ചെയ്ത കെജ്രിവാളിന് തിരഞ്ഞെടുപ്പ് പ്രചാരണത്തിനായി മെയ് 10ന് സുപ്രീംകോടതി ഇടക്കാല ജാമ്യം അനുവദിച്ചിരുന്നു. തിരഞ്ഞെടുപ്പ് കഴിഞ്ഞ് ജൂൺ രണ്ടിന് തിരകെ ജയിലിലേക്ക് മടങ്ങണമെന്നായിരുന്നു കോടതി നിർദേശം. മദ്യനയ അഴിമതി കേസിലാണ് കെജ്രിവാളിനെ അറസ്റ്റ് ചെയ്തത്. തിരഞ്ഞെടുപ്പ് പ്രചരണത്തിനായി പുറത്തിറങ്ങിയ കെജരിവാൾ 67 റോഡ്ഷോകളിലും റാലികളിലും പൊതുയോഗങ്ങളിലും പങ്കെടുക്കുകയും വിവിധ മാധ്യമങ്ങൾക്ക് 30 അഭിമുഖങ്ങൾ നൽകുകയും ചെയ്തിരുന്നു.