സണ്ണി ഡിയോള്‍ നായകനായ ചിത്രം ബോർഡറിന് രണ്ടാം ഭാഗമൊരുങ്ങുന്നു. രണ്ടാം ഭാഗത്തിൽ ബോളിവുഡിലെ യുവതാരങ്ങളിൽ നിരവധിപ്പേർ ഭാഗമാകുമെന്നും റിപ്പോർട്ടുകളുണ്ട്. ഏതാനും ആഴ്ചകൾക്കുള്ളിൽ സിനിമയുടെ പ്രഖ്യാപനം നടക്കുമെന്നാണ് സൂചന.
കഴിഞ്ഞ രണ്ട് - മൂന്ന് വർഷങ്ങളായി അണിയറപ്രവർത്തകർ സിനിമയുടെ ചർച്ചയിലായിരുന്നു എന്നാണ് പിങ്ക് വില്ല റിപ്പോർട്ട് ചെയ്യുന്നത്. 1971 ലെ ഇന്ത്യ - പാകിസ്താൻ യുദ്ധത്തിന്റെ പശ്ചാത്തലത്തിലാകും സിനിമയുടെ കഥ എന്നും സൂചനകളുണ്ട്.
1997ലാണ് ബോർഡർ ഒന്നാം ഭാഗം റിലീസ് ചെയ്തത്. സണ്ണി ഡിയോളിന് പുറമെ സുനിൽ ഷെട്ടി, ജാക്കി ഷ്രോഫ്, അക്ഷയ് ഖന്ന, പൂജ ഭട്ട്, തബു തുടങ്ങിയ വൻ താരനിര സിനിമയുടെ ഭാഗമായിരുന്നു. ആ വർഷത്തെ ഏറ്റവും വലിയ വിജയങ്ങളിൽ ഒന്നായിരുന്നു ബോർഡർ.
നിലവിൽ ഗദർ 2 എന്ന സിനിമയാണ് സണ്ണി ഡിയോളിന്റെതായി റിലീസ് ചെയ്തിരിക്കുന്നത്. 'ഗദര്‍: ഏക് പ്രേം കഥ' എന്ന 2001-ല്‍ പുറത്തിറങ്ങിയ വിജയ ചിത്രത്തിന്റെ സീക്വലാണിത്. മികച്ച പ്രേക്ഷക പ്രതികരണത്തിലൂടെ വൻ കുതിപ്പാണ് ഗദർ 2 നടത്തിക്കൊണ്ടിരിക്കുന്നത്. 300 കോടിയ്ക്ക് മുകളിലാണ് ചിത്രം ഇന്ത്യയിൽ നിന്ന് മാത്രം നേടിയിരിക്കുന്നത്. ഇതോടെ ഷാരൂഖ് ഖാന് ശേഷം ബോളിവുഡ് ബോക്സ് ഓഫീസിന് മികച്ച കളക്ഷൻ നേടിക്കൊടുത്ത നടനായി മാറിയിരിക്കുകയാണ് സണ്ണി ഡിയോൾ.
