![പ്രേതമായെത്തി പേടിപ്പിക്കാൻ തമന്ന വാങ്ങിയത് കോടികൾ; 'അരൺമനൈ'യിലെ പ്രതിഫലം ഇങ്ങനെ](http://media.assettype.com/reporterlive%2F2024-05%2F783985e5-43e9-4c4f-85c1-345f26b879a6%2Faranmanai_4_tamanna.jpg?w=480&auto=format%2Ccompress&fit=max)
സുന്ദർ സി സംവിധാനം ചെയ്ത പുതിയ ചിത്രം അരൺമനൈ 4 തിയേറ്ററുകളിൽ വലിയ വിജയം നേടുകയാണ്. ഭോല ശങ്കർ, ബാന്ദ്ര എന്നീ സിനിമകളുടെ പരാജയത്തിന് ശേഷം തെന്നിന്ത്യൻ നായിക തമന്നയ്ക്ക് ഒരു തിരിച്ചുവരവ് നൽകിയ സിനിമ കൂടിയാണ് അരൺമനൈ 4. സിനിമയ്ക്കായി തമന്ന വാങ്ങിയ പ്രതിഫലമാണ് ഇപ്പോൾ ചർച്ചയാകുന്നത്.
അരൺമനൈയിലെ കഥാപാത്രത്തിനായി തമന്നയ്ക്ക് നാല് മുതൽ അഞ്ച് കോടി വരെ ലഭിച്ചതായി ന്യൂസ് 18 റിപ്പോർട്ട് ചെയ്യുന്നു. തെന്നിന്ത്യൻ സിനിമയിലെ മുൻനിര നായികമാരിൽ ഒരാളാണ് തമന്ന. രണ്ട് മുതൽ അഞ്ച് കോടി വരെയാണ് നടി സിനിമകൾക്കായി പ്രതിഫലമായി വാങ്ങാറുള്ളത്. ജയിലർ എന്ന ചിത്രത്തിലെ കഥാപാത്രത്തിനായി മൂന്ന് കോടിയായിരുന്നു നടിയുടെ പ്രതിഫലം.
അതേസമയം അരൺമനൈ 4 ആഗോളതലത്തിൽ 35 കോടിക്ക് മുകളിൽ കലക്ഷന് നേടിക്കഴിഞ്ഞു. സുന്ദര് സിയുടെ സ്ഥിരം ഫോര്മാറ്റില് എത്തിയ ചിത്രത്തില് സംവിധായകനും പ്രധാന വേഷത്തില് എത്തിയിരുന്നു. തമന്നയ്ക്ക് പുറമെ റാഷി ഖന്നയും സിനിമയിൽ ഒരു നായികാ കഥാപാത്രത്തെ അവതരിപ്പിക്കുന്നുണ്ട്. സന്തോഷ് പ്രതാപ്, രാമചന്ദ്ര രാജു, കോവൈ സരള, യോഗി ബാബു, കെ എസ് രവികുമാർ, ജയപ്രകാശ്, വിടിവി ഗണേഷ്, ഡൽഹി ഗണേഷ്, രാജേന്ദ്രൻ, സിംഗംപുലി എന്നിവരാണ് മറ്റ് സഹതാരങ്ങൾ.
അരൺമനൈ ഫ്രാഞ്ചൈസിയിലെ ആദ്യ ചിത്രം 2014ൽ ആണ് റിലീസ് ചെയ്തത്. സുന്ദർ, ഹൻസിക, വിനയ് റായ്, ആൻഡ്രിയ എന്നിവരായിരുന്നു പ്രധാന വേഷങ്ങളിൽ എത്തിയത്. വെങ്കട് രാഘവൻ ആയിരുന്നു തിരക്കഥ. 2016ൽ പുറത്തിറങ്ങിയ രണ്ടാമത്തെ ചിത്രത്തിൽ സിദ്ധാർത്ഥ്, തൃഷ എന്നിവരെ കൂടാതെ സുന്ദറും ഹൻസികയും അഭിനയിച്ചു. 2021ൽ പുറത്തിറങ്ങിയ മൂന്നാമത്തെ ചിത്രത്തിൽ സുന്ദർ, ആര്യ, റാഷി, ആൻഡ്രിയ എന്നിവരാണ് കഥാപാത്രങ്ങളായത്.