നടൻ റിയാസ് ഖാന്റെ അഭിനയ ജീവിതത്തിലെ തന്നെ ഏറ്റവും ശ്രദ്ധേയമായ വേഷങ്ങളിൽ ഒന്നായിരുന്നു ഗജിനിയിലെ പൊലീസ് ഉദ്യോഗസ്ഥന്റേത്. സൂര്യ ചെയ്ത സഞ്ജയ് രാമസ്വാമി എന്ന കഥാപാത്രത്തിന്റെ ഫ്ലാഷ്ബാക്ക് എന്തെന്ന് പ്രേക്ഷകർക്ക് മനസിലായത് റിയാസിന്റെ കഥാപാത്രത്തിലൂടെയാണ്. പിന്നീട് ഗജിനി ഹിന്ദിയിലേക്ക് റീമേക്ക് ചെയ്തപ്പോഴും ആ പൊലീസ് കഥാപാത്രമായത് റിയാസ് ഖാൻ തന്നെയാണ്. ഇപ്പോഴിതാ ആ വേഷത്തെക്കുറിച്ച് റിപ്പോർട്ടർ ടിവിയുമായി സംസാരിക്കുകയാണ് നടൻ.
'രമണയിലാണ് എ ആർ മുരുഗദോസിനൊപ്പം ഞാൻ ആദ്യമായി അഭിനയിക്കുന്നത്. ആ സമയം മുതൽ ഞങ്ങൾ തമ്മിൽ സൗഹൃദമായി. ഞാൻ എങ്ങനെ പെർഫോം ചെയ്യുമെന്ന് അദ്ദേഹത്തിന് അറിയാം. അതിനാൽ തന്നെ ഞാൻ സ്വാഭാവികമായി ഗജിനിയുടെ ഭാഗമായി. രണ്ട് ശക്തരായ ആളുകൾ വേണം ആ രംഗത്തിന്. അങ്ങനെയാണ് സൂര്യയ്‌ക്കൊപ്പം ഗജിനിയിൽ അഭിനയിച്ചത്,' റിയാസ് ഖാൻ പറഞ്ഞു.
ഗജിനി ഹിന്ദിയിലേക്ക് റീമേക്ക് ചെയ്തപ്പോൾ ആമിർ ഖാനാണ് ആ കഥാപാത്രത്തിലേക്ക് തന്നെ പരിഗണിച്ചത്. ആ സിനിമയുടെ അണിയറപ്രവർത്തകർ ഹിന്ദി താരങ്ങളെ തന്നെയാണ് ആദ്യം പരിഗണിച്ചിരുന്നത്. എന്നാൽ റിയാസ് തന്നെ ചെയ്താൽ മതിയെന്ന് ആമിർ സാർ പറഞ്ഞു. നായിക, വില്ലൻ, പൊലീസ് ഓഫീസർ, ഈ മൂന്ന് കഥാപാത്രങ്ങളെയും മാറ്റരുതെന്ന് അദ്ദേഹം നിർബന്ധിച്ചതായും റിയാസ് ഖാൻ വ്യക്തമാക്കി.
