![ജപ്പാനെ തകർത്തു; ഏഷ്യൻ കബഡി ചാമ്പ്യൻഷിപ്പിൽ ഇന്ത്യയ്ക്ക് മൂന്നാം ജയം](http://media.assettype.com/reporterlive%2F2023-06%2F84f4b56c-17f8-49ef-92c2-f175ecb80436%2Fkbd.jpg?w=480&auto=format%2Ccompress&fit=max)
ബുസാൻ/ദക്ഷിണ കൊറിയ : ഏഷ്യൻ കബഡി ചാമ്പ്യൻഷിപ്പിൽ ഇന്ത്യയ്ക്ക് തുടർച്ചയായ മൂന്നാം ജയം. ആദ്യ രണ്ട് മത്സരങ്ങൾക്ക് സമാനമായി എതിരാളികളെ നിഷ്പ്രഭമാക്കിയാണ് ഇന്ത്യൻ വിജയം. 62-18 എന്ന പോയിൻ്റിനാണ് ജപ്പാനെതിരെ ഇന്ത്യയുടെ ജയം. പതിവുപോലെ കബഡിയിലെ ഇന്ത്യൻ ആധിപത്യമാണ് ജപ്പാനെതിരെയും കണ്ടത്. ഇന്ത്യ ആദ്യ പതിനഞ്ച് പോയിൻ്റ് നേടിയപ്പോഴും ജപ്പാന് ആദ്യ പോയിൻ്റ് നേടാൻ കഴിഞ്ഞില്ല. ആദ്യ പകുതി പിന്നിടുമ്പോൾ 32-6 എന്നായിരുന്നു പോയിൻ്റ് നില.
രണ്ടാം പകുതിയിലും ഇന്ത്യൻ ആധിപത്യം തുടർന്നു. 62-18 എന്ന മികച്ച പോയിൻ്റോടെയാണ് ജപ്പാനെതിരായ വിജയം ആഘോഷിച്ചത്. ഏഷ്യൻ ചാമ്പ്യൻഷിപ്പ് കബഡിയിൽ കിരീടം നിലനിർത്തുകയാണ് ഇന്ത്യൻ ലക്ഷ്യം. ഇറാനെതിരെയും ഹോങ്കോങ്ങിനെതിരെയുമാണ് ഇന്ത്യയുടെ അവശേഷിക്കുന്ന ഗ്രൂപ്പ് മത്സരങ്ങൾ.
അതിനിടെ ഇന്ന് നടന്ന മറ്റു മത്സരങ്ങളിൽ ജപ്പാനും ഇറാനും ചൈനയും ജയം നേടി. ദക്ഷിണ കൊറിയയ്ക്കെതിരെ 45-18 എന്ന പോയിൻ്റിനാണ് ജപ്പാൻ്റെ ജയം. 60-31 എന്ന പോയിൻ്റിൽ ഹോങ്കോങ്ങിനെ ഇറാനും തോൽപ്പിച്ചു. ദക്ഷിണ കൊറിയയെ 72-17 എന്ന പോയിൻ്റിന് തോൽപ്പിച്ച് ഇറാൻ ഇന്ന് മറ്റൊരു വിജയവും നേടി. മറ്റൊരു മത്സരത്തിൽ 117-12 എന്ന പോയിൻ്റിന് ചൈന ഹോങ്കോങ്ങിനെ തകർത്തു.