Get the latest news at
your fingertips!
Download our app now
LIVE TV
Search
ദുലീപ് ട്രോഫിയില്‍ സെഞ്ച്വറി നേടിയ മലയാളി താരം സഞ്ജു സാംസണെ പുകഴ്ത്തി ഇന്ത്യയുടെ ടി20 ക്യാപ്റ്റന്‍ സൂര്യകുമാര്‍ യാദവ്. ഇന്ത്യ ബി ടീമിനെതിരെ നടന്ന മത്സരത്തില്‍ ഇന്ത്യ ഡിക്ക് വേണ്ടി കഴിഞ്ഞ ദിവസമാണ് സഞ്ജു സെഞ്ച്വറി നേടിയത്. വെടിക്കെട്ട് പ്രകടനത്തിന് പിന്നാലെ സഞ്ജു സോഷ്യല്‍ മീഡിയയില്‍ പങ്കുവെച്ച പോസ്റ്റിന് താഴെയാണ് സൂര്യകുമാര്‍ യാദവ് അഭിനന്ദനങ്ങള്‍ അറിയിച്ച് എത്തിയത്.
ദുലീപ് ട്രോഫിയിലെ കിടിലന്‍ ഇന്നിങ്‌സിനിടെ പകര്‍ത്തിയ ചിത്രങ്ങളാണ് സഞ്ജു ഔദ്യോഗിക ഇന്‍സ്റ്റഗ്രാം ഹാന്‍ഡിലില്‍ പോസ്റ്റ് ചെയ്തത്. 'വെള്ളക്കുപ്പായത്തിലും ചുവന്ന പന്തിലുമായുള്ള നല്ല സമയങ്ങള്‍' എന്ന അടിക്കുറിപ്പോടെയാണ് മലയാളി വിക്കറ്റ് കീപ്പര്‍ ബാറ്ററുടെ പോസ്റ്റ്. ഇതിനുതാഴെ 'ടോപ് മാന്‍, ടോപ് നോക്ക് ചേട്ടാ' എന്നാണ് സൂര്യകുമാര്‍ യാദവ് കമന്റിട്ടത്.
സഞ്ജുവിന്റെ പോസ്റ്റിനൊപ്പം സൂര്യയുടെ കമന്റും ആരാധകര്‍ ഏറ്റെടുത്തുകഴിഞ്ഞു. ദുലീപ് ട്രോഫിയില്‍ ഇന്ത്യ ബി ടീം അംഗമാണ് സൂര്യകുമാര്‍. സ്വന്തം ടീമിനെതിരെ സെഞ്ച്വറി അടിച്ചിട്ടും സഞ്ജുവിനെ അഭിനന്ദിച്ച് സൂര്യ എത്തിയെന്നതാണ് പ്രത്യേകത.
ഇന്ത്യ ബിക്കെതിരായ മത്സരത്തിന്റെ രണ്ടാം ദിനമാണ് ഇന്ത്യ ഡി ടീമിന്റെ താരമായ സഞ്ജുവിന്റെ സെഞ്ച്വറിനേട്ടം. 95 പന്തുകളില്‍ നിന്നാണ് സഞ്ജു മൂന്നക്കം തികച്ചത്. 11 ബൗണ്ടറിയും മൂന്ന് സിക്സറുകളുമാണ് മലയാളി വിക്കറ്റ് കീപ്പര്‍ ബാറ്ററുടെ ബാറ്റില്‍ നിന്ന് പിറന്നത്. സഞ്ജുവിന്റെ 11-ാമത്തെ ഫസ്റ്റ് ക്ലാസ് സെഞ്ച്വറിയാണിത്.
