ശ്രീലങ്കയ്ക്കെതിരായ ആദ്യ ട്വന്റി 20; വെസ്റ്റ് ഇൻഡീസിന് അഞ്ച് വിക്കറ്റ് ജയം

ആദ്യ വിക്കറ്റിൽ വിൻഡീസ് ഓപണർമാർ 9.1 ഓവറിൽ 107 റൺസെടുത്തു.

റിപ്പോർട്ടർ നെറ്റ്‌വര്‍ക്ക്‌

1 min read|13 Oct 2024, 11:46 pm

ശ്രീലങ്കയ്ക്കെതിരായ ഒന്നാം ട്വന്റി 20യിൽ വെസ്റ്റ് ഇൻഡീസിന് അഞ്ച് വിക്കറ്റ് ജയം. മത്സരത്തിൽ ആദ്യം ബാറ്റ് ചെയ്ത ശ്രീലങ്ക 20 ഓവറിൽ ഏഴ് വിക്കറ്റ് നഷ്ടത്തിൽ 179 റൺസെടുത്തു. കാമിൻഡു മെൻഡിസും ചരിത് അസലങ്കയും നേടിയ അർധ സെഞ്ച്വറി മികവിലാണ് ശ്രീലങ്ക മികച്ച സ്കോറിലേക്ക് എത്തിയത്. മറുപടി പറഞ്ഞ വെസ്റ്റ് ഇൻഡീസ് 19.1 ഓവറിൽ അഞ്ച് വിക്കറ്റ് നഷ്ടത്തിൽ ലക്ഷ്യത്തിലെത്തി. ബ്രണ്ടൻ കിങ്, എവിൻ ലിവ്സ് എന്നിവരുടെ അർധ ശതകങ്ങളാണ് വിൻഡീസിനെ വിജയത്തിലേക്ക് നയിച്ചത്.

മത്സരത്തിൽ ടോസ് നേടിയ വെസ്റ്റ് ഇൻഡീസ് ബൗളിങ് തിരഞ്ഞെടുത്തു. ഒരു ഘട്ടത്തിൽ 58ന് മൂന്ന് എന്ന പരിതാപകരമായ നിലയിലായി ലങ്ക. നാലാം വിക്കറ്റിൽ മെൻഡിസും അസലങ്കയും ചേർന്ന് നേടിയ 82 റൺസ് കൂട്ടുകെട്ടാണ് ലങ്കൻ ഇന്നിംഗ്സിന് കരുത്തായത്. മെൻഡിസ് 51 റൺസും അസലങ്ക 59 റൺസുമെടുത്തു. വിൻഡീസിനായി റൊമാരിയോ ഷെപ്പേർഡ് രണ്ട് വിക്കറ്റ് വീഴ്ത്തി.

മറുപടി ബാറ്റിങ്ങിൽ ആദ്യ വിക്കറ്റിൽ തന്നെ വിൻഡീസ് ഓപണർമാർ 9.1 ഓവറിൽ 107 റൺസെടുത്തു. ബ്രണ്ടൻ കിങ് 67 റൺസും എവിൻ ലീവ്സ് 50 റൺസുമെടുത്തു. പിന്നാലെ കൃത്യമായ ഇടവേളകളിൽ വിക്കറ്റ് നഷ്ടമായെങ്കിലും അവസാന ഓവറിൽ വെസ്റ്റ് ഇൻഡീസ് വിജയത്തിലെത്തി. ലങ്കൻ ബൗളിങ് നിരയിൽ മതീഷ പതിരാന രണ്ട് വിക്കറ്റെടുത്തു.