Get the latest news at
your fingertips!
Download our app now
LIVE TV
Search
ന്യൂസിലാന്‍ഡിനെതിരായ രണ്ടാം ടെസ്റ്റിന് ഒരുങ്ങുകയാണ് ടീം ഇന്ത്യ. ഒക്ടോബര്‍ 24 മുതല്‍ പൂനെയിലാണ് രണ്ടാം ടെസ്റ്റ് ആരംഭിക്കുന്നത്. മത്സരത്തിന് മുന്‍പായി പൂനെയില്‍ എത്തിയ ഇന്ത്യന്‍ ക്യാപ്റ്റന്‍ രോഹിത് ശര്‍മയും ആരാധികയും തമ്മിലുണ്ടായ രസകരമായ വീഡിയോയാണ് ഇപ്പോള്‍ വൈറലാവുന്നത്. രോഹിത്തിനോട് ഓട്ടോഗ്രാഫ് ആവശ്യപ്പെടുന്നതിനിടയില്‍ കോഹ്‌ലിയോടുള്ള തന്റെ ആരാധന യുവതി വെളിപ്പെടുത്തുന്നതും തുടര്‍ന്നുള്ള രോഹിത്തിന്റെ മറുപടിയുമാണ് ആരാധകരുടെ മനസ് കീഴടക്കുന്നത്.
പൂനെയിലെ മഹാരാഷ്ട്ര ക്രിക്കറ്റ് സ്റ്റേഡിയത്തില്‍ പരിശീലന സെഷന് വേണ്ടി ടീമിനൊപ്പം എത്തിയതായിരുന്നു രോഹിത്. പരിശീലനത്തിന് ശേഷം ഗ്രൗണ്ടില്‍ നിന്ന് മടങ്ങുകയായിരുന്ന രോഹിത്തിനോട് ഓട്ടോഗ്രാഫ് ആവശ്യപ്പെട്ട് ഒരു ആരാധിക സമീപിക്കുകയാണ്. രോഹിത് അടുത്തെത്തി ഓട്ടോഗ്രാഫ് നല്‍കുമ്പോള്‍ യുവതി നന്ദി പറയുകയും ചെയ്യുന്നുണ്ട്.
എന്നാല്‍ യുവതിയുടെ മറ്റൊരു അഭ്യര്‍ത്ഥനയാണ് രോഹിത്തിനെ ചിരിപ്പിച്ചത്. വിരാട് കോഹ്‌ലിയുടെ ഒരു വലിയ ആരാധികയാണ് താനെന്ന് അദ്ദേഹത്തോട് പറയാമോ എന്നാണ് യുവതി ചോദിക്കുന്നത്. കോഹ്‌ലിയോട് പറയാമെന്ന് ചിരിച്ചുകൊണ്ട് പറഞ്ഞ് രോഹിത് ഓട്ടോഗ്രാഫ് യുവതിക്ക് നല്‍കുന്നതും വീഡിയോയില്‍ കാണാം.
Rohit Sharma's conversation with a fan:
— Mufaddal Vohra (@mufaddal_vohra) October 22, 2024
Fan - Rohit bhai, please give autograph.
Rohit - I'm coming, wait.
Fan - thank you so much, tell Virat also that his big fan came here.
Rohit - I'll tell Virat. 😄❤️pic.twitter.com/q0fUWHtcWm
രോഹിത്തും ആരാധികയും തമ്മിലെ സംഭാഷണത്തിന്റെ പൂര്‍ണരൂപം:
യുവതി: രോഹിത് ഭായ്, ഒരു ഓട്ടോഗ്രാഫ് തരുമോ?
രോഹിത്: ഞാനിതാ വരുന്നു, വെയ്റ്റ് ചെയ്യൂ
യുവതി: വളരെ നന്ദിയുണ്ട്. വിരാട് കോഹ്‌ലിയോട് അദ്ദേഹത്തിന്റെ ഒരു വലിയ ആരാധിക ഇവിടെ വന്നിട്ടുണ്ടെന്ന് അറിയിക്കാമോ?
രോഹിത്: (ചിരിച്ചുകൊണ്ട്) ഞാന്‍ വിരാടിനോട് പറയാം.
രസകരമായ സംഭവത്തിന്റെ ദൃശ്യങ്ങള്‍ സാമൂഹിക മാധ്യമങ്ങളില്‍ നിമിഷങ്ങള്‍ക്കുള്ളില്‍ തന്നെ വൈറലായി. ആരാധികയുടെ രസകരമായ ചോദ്യവും രോഹിത്തിന്റെ മറുപടിയും ആരാധകരുടെ മനസ് കീഴടക്കിയിട്ടുണ്ട്. നിരവധി പേരാണ് വീഡിയോയ്ക്ക് താഴെ പ്രതികരണങ്ങള്‍ അറിയിച്ച് എത്തുന്നത്.
Content Highlights: Fan Girl Asks Rohit Sharma To Give Virat Kohli A Message, His Reply Wins Internet, Video Goes Viral
