LIVE TV
ഇന്ത്യൻ പ്രീമിയർ ലീഗ് 18-ാം സീസണിന് ദിവസങ്ങൾ മാത്രം ബാക്കി നിൽക്കെ ഡൽഹി ക്യാപിറ്റൽസ് നായകസ്ഥാനം കെ എൽ രാഹുൽ വേണ്ടെന്നുവെച്ചതായി റിപ്പോർട്ട്. ഒരു താരമെന്ന നിലയിൽ ഡൽഹിക്കായി മികച്ച പ്രകടനം കാഴ്ചവെയ്ക്കുകയാണ് താരത്തിന്റെ ലക്ഷ്യമെന്നാണ് സൂചന. അങ്ങനെയെങ്കിൽ അക്സർ പട്ടേലിനെ ഡൽഹി ക്യാപിറ്റൽസിന്റെ നായകനായി നിയമിച്ചേക്കും.
അക്സർ പട്ടേലാവും അടുത്ത ഐപിഎല്ലിൽ ഡൽഹിയുടെ നായകൻ. രാഹുലിനോട് നായകസ്ഥാനം ഏറ്റെടുക്കാമോയെന്ന് ടീം മാനേജ്മെന്റ് ചോദിച്ചിരുന്നു. എന്നാൽ ഒരു താരമായി ടീമിന് മികച്ച സംഭാവന നൽകാനാണ് രാഹുൽ ആഗ്രഹിക്കുന്നത്. ഡൽഹി ക്യാപിറ്റൽസിനോട് അടുത്ത വൃത്തങ്ങൾ ഇന്തോ-ഏഷ്യൻ ന്യൂസ് സർവീസിനോട് പ്രതികരിച്ചു.
അതിനിടെ ഐപിഎല്ലിലെ ആദ്യ രണ്ട് മത്സരങ്ങളിൽ ഇന്ത്യൻ താരം കൂടിയായ കെ എൽ രാഹുൽ കളിച്ചേക്കില്ലെന്നും റിപ്പോർട്ടുകളുണ്ട്. 32കാരനായ രാഹുൽ തന്റെ ആദ്യ കുഞ്ഞിന്റെ പിറവിയ്ക്കായി കാത്തിരിക്കുകയാണെന്നാണ് റിപ്പോർട്ടുകൾ സൂചിപ്പിക്കുന്നത്. തുടർന്നാണ് താരത്തിന് ഐപിഎല്ലിലെ ആദ്യ മത്സരങ്ങളിൽ നിന്ന് പിന്മാറേണ്ടി വരുമെന്നാണ് സൂചന. കഴിഞ്ഞ ദിവസം ഇംഗ്ലണ്ട് താരം ഹാരി ബ്രൂക്ക് ഐപിഎല്ലിൽ നിന്ന് പിന്മാറിയത് ഡൽഹി ക്യാപിറ്റൽസിന് തിരിച്ചടിയായിരുന്നു. ഇംഗ്ലണ്ടിനായി വരും സീരിസുകളിൽ മികച്ച പ്രകടനം നടത്താൻ ഐപിഎല്ലിൽ നിന്ന് പിന്മാറുന്നുവെന്നായിരുന്നു ബ്രൂക്കിന്റെ വിശദീകരണം.
ഐപിഎല്ലിൽ മാർച്ച് 24ന് ലഖ്നൗ സൂപ്പർ ജയന്റ്സിനെതിരെയാണ് ഡൽഹി ക്യാപിറ്റൽസിന്റെ ആദ്യ മത്സരം. കഴിഞ്ഞ വർഷത്തെ ഡൽഹി ക്യാപിറ്റൽസ് നായകനായിരുന്ന റിഷഭ് പന്താണ് ഇത്തവണ ലഖ്നൗ സൂപ്പർ ജയന്റ്സിന്റെ നായകൻ. വരും ദിവസങ്ങളിൽ ഡൽഹി ക്യാപിറ്റൽസ് അവരുടെ ക്യാപ്റ്റനെ പ്രഖ്യാപിക്കുമെന്നാണ് കരുതുന്നത്.
ഐപിഎൽ 2025നുള്ള ഡൽഹി ക്യാപിറ്റൽസ് ടീം: മിച്ചൽ സ്റ്റാർക്, കെ എൽ രാഹുൽ, ജെയ്ക് ഫ്രെയ്സർ മക്ഗർഗ്, ടി നടരാജൻ, കരുൺ നായർ, മോഹിത് ശർമ, സമീർ റിസ്‍വി, അക്സർ പട്ടേൽ, കുൽദീപ് യാദവ്, ട്രിസ്റ്റൻ സ്റ്റബ്സ്, അഭിഷേക് പോറൽ, ഫാഫ് ഡു പ്ലെസിസ്, മുകേഷ് കുമാർ, ദർശൻ നാൽക്കാണ്ടെ, വിപരാജ് നിഗം, ദുഷ്മന്ത ചമീര, ഡൊണോവൻ ഫെരേര, അജയ് മൻഡൽ, മൻവൻത് കുമാർ ത്രിപുരണ വിജയ്, മാദവ് തിവാരി.
Content Highlights: KL Rahul rejects Delhi Capitals captaincy, new skipper finalized
