Get the latest news at
your fingertips!
Download our app now
LIVE TV
Search
മാർഗാവോ: സന്തോഷ് ട്രോഫിയിൽ നിർണായക മത്സരത്തിൽ കേരളത്തിന് തോൽവി. എതിരില്ലാത്ത ഒരു ഗോളിന് ഗോവയാണ് കേരളത്തെ തോൽപ്പിച്ചത്. 58-ാം മിനിറ്റിൽ ഗോവൻ താരം ത്രിജോയ് ഡയസ് ആണ് ഗോൾ നേടിയത്. നിർണായക മത്സരത്തിലെ ജയത്തോടെ ഗോവ സന്തോഷ് ട്രോഫി ഫൈനൽ റൗണ്ടിന് യോഗ്യത ഉറപ്പാക്കി. പക്ഷേ തോൽവിയോടെ ഫൈനൽ റൗണ്ട് പ്രവേശനത്തിന് കേരളം ഇനിയും കാത്തിരിക്കണം.
ആറ് ഗ്രൂപ്പുകളിലായി 36 ടീമുകളാണ് സന്തോഷ് ട്രോഫിയിൽ മത്സരിക്കുന്നത്. നിലവിലത്തെ ചാമ്പ്യന്മാർക്കും റണ്ണർ അപ്പുകൾക്കും ഫൈനൽ റൗണ്ടിന് നേരിട്ട് യോഗ്യത ലഭിക്കും. ആറ് ഗ്രൂപ്പുകളിലായി ഒന്നാമതെത്തുന്ന ടീമുകൾക്കും ഫൈനൽ റൗണ്ടിലേക്ക് പ്രവേശനം ഉറപ്പാക്കാം. കൂടാതെ ആറ് ഗ്രൂപ്പുകളിലായി രണ്ടാം സ്ഥാനത്ത് എത്തുന്ന നാല് ടീമുകൾക്കും ഫൈനൽ റൗണ്ടിലേക്ക് പ്രവേശിക്കാം.
ഗോവയ്ക്കെതിരെ ഒരു സമനില ഉണ്ടായിരുന്നെങ്കിൽ കേരളം ഫൈനൽ റൗണ്ടിൽ എത്തുമായിരുന്നു. ആദ്യ മത്സരങ്ങളിൽ തകർപ്പൻ ജയവുമായി കേരളം മുന്നേറിയിരുന്നു. ഗുജറാത്തിനെയും ഛത്തീസ്ഗണ്ഡിനെയും എതിരില്ലാത്ത മൂന്ന് ഗോളിനാണ് കേരളം തോൽപ്പിച്ചത്. ജമ്മു കാശ്മീരിനെ ഒന്നിനെതിരെ ആറ് ഗോളുകൾക്കും കേരളം ജയിച്ചിരുന്നു. ഗ്രൂപ്പിൽ രണ്ടാം സ്ഥാനത്തുള്ള കേരളത്തിന് ഇനി ഫൈനൽ റൗണ്ടിൽ പ്രവേശിക്കണമെങ്കിൽ മറ്റ് ടീമുകളുടെ ഫലങ്ങളെയും ആശ്രയിക്കണം.
