Get the latest news at
your fingertips!
Download our app now
LIVE TV
Search
റിയാദ്: 2023-24 സീസണ് മൂന്ന് കിരീടനേട്ടത്തോടെ അവസാനിപ്പിച്ചിരിക്കുകയാണ് സൗദി വമ്പന്മാരായ അല് ഹിലാല്. സീസണിലെ അവസാന ടൂര്ണമെന്റായ കിങ്സ് കപ്പില് അല് നസറിനെ പരാജയപ്പെടുത്തി ചാമ്പ്യന്മാരായതോടെയാണ് അല് ഹിലാല് കിരീടനേട്ടം മൂന്നാക്കിയത്. നേരത്തെ സൗദി സൂപ്പര് കപ്പും സൗദി പ്രോ ലീഗ് കിരീടവും സൂപ്പര് താരം നെയ്മറിന്റെ ക്ലബ്ബ് സീസണില് സ്വന്തമാക്കിയിരുന്നു. ഇതിന് പിന്നാലെ കിരീടങ്ങള്ക്ക് നന്ദിയും അഭിനന്ദനവും അറിയിച്ച് രംഗത്തെത്തിയിരിക്കുകയാണ് നെയ്മര്.
'അതിശയകരമായ ഒരു സീസണ് പൂര്ത്തിയാക്കിയതില് അഭിനന്ദനങ്ങള്. നിങ്ങള് ഉജ്ജ്വല പ്രകടനം തന്നെയാണ് കാഴ്ച വെച്ചത്. ഈ വര്ഷത്തെ മൂന്ന് കിരീടങ്ങള്ക്കും നന്ദി. അടുത്ത സീസണ് എനിക്ക് വിട്ടുതന്നേക്കൂ', നെയ്മര് ഇന്സ്റ്റഗ്രാമില് കുറിച്ചു. ഈ വര്ഷം സൗദിക്ക് നീലനിറമാണെന്നും നെയ്മര് കൂട്ടിച്ചേര്ത്തു.
സീസണില് പരിക്ക് കാരണം നെയ്മറിന് അല് ഹിലാലിന് വേണ്ടി കളിക്കാന് സാധിച്ചിരുന്നില്ല. എങ്കിലും അല് ഹിലാലിന് പ്രധാന മത്സരങ്ങള്ക്കെല്ലാം സാക്ഷിയായി ഗ്യാലറിയിലെ സജീവസാന്നിധ്യമായി നെയ്മര് എത്താറുണ്ട്. കിങ്സ് കപ്പ് ഫൈനല് അരങ്ങേറിയ ജിദ്ദയിലെ കിങ് അബ്ദുല്ല സ്റ്റേഡിയത്തിലും നെയ്മര് അല് ഹിലാലിനെ പ്രോത്സാഹിപ്പിക്കുന്നതിന് വേണ്ടി എത്തിയിരുന്നു.
റൊണാള്ഡോയ്ക്കും അല് നസറിനും 'സഡന് ഡെത്ത്'; കിങ്സ് കപ്പില് അല് ഹിലാല് ചാമ്പ്യന്മാര്കലാശപ്പോരില് സൂപ്പര് താരം ക്രിസ്റ്റ്യാനോ റൊണാള്ഡോയുടെ അല് നസറിനെ തകര്ത്താണ് അല് ഹിലാല് കിങ്സ് കപ്പില് മുത്തമിട്ടത്. സഡന് ഡെത്തിലായിരുന്നു അല് ഹിലാല് വിജയമുറപ്പിച്ചത്. മത്സരത്തിലെ നിശ്ചിത സമയത്തും അധികസമയത്തും ഇരുടീമുകളും ഓരോ ഗോളടിച്ച് പിരിയുകയായിരുന്നു. പെനാല്റ്റി ഷൂട്ടൗട്ടില് 5-4 എന്ന സ്കോറിനാണ് അല് ഹിലാല് വിജയിച്ചത്.
