Get the latest news at
your fingertips!
Download our app now
LIVE TV
Search
ഇന്ത്യൻ സൂപ്പർ ലീഗിൽ ഒഡീഷ എഫ് സിയെ സമനിലയിൽ തളച്ച് കേരളാ ബ്ലാസ്റ്റേഴ്സ്. ഇരുടീമുകളും രണ്ട് ഗോളുകൾ വീതം നേടിയാണ് സമനിലയിൽ പിരിഞ്ഞത്. ആവേശകരമായ ആദ്യ പകുതിയിലാണ് ഇരുടീമുകളുടെയും രണ്ട് ഗോളുകളും പിറന്നത്. ബ്ലാസ്റ്റേഴ്സിനായി നോഹ സദോയി തുടർച്ചയായ മൂന്നാം മത്സരത്തിലും വലചലിപ്പിച്ചു. ജീസസ് ജിമനെസ് ആണ് കൊമ്പന്മാർക്കായി മറ്റൊരു ഗോൾ നേടിയത്.
മത്സരത്തിന്റെ ആദ്യ മിനിറ്റുകളിൽ ബ്ലാസേഴ്സായിരുന്നു പന്തടക്കത്തിൽ ഉൾപ്പടെ മുന്നേറിയത്. 21 മിനിറ്റുകൾക്കുള്ളിൽ മഞ്ഞപ്പട രണ്ട് ഗോളുകൾക്ക് മുന്നിലായി. 18-ാം മിനിറ്റിൽ നോഹ സദോയിയുടെ ഇടം കാൽ ഷോട്ടിലൂടെ ബ്ലാസ്റ്റേഴ്സ് മുന്നിലെത്തി. തൊട്ടുപിന്നാലെ നോഹയുടെ അസിസ്റ്റിലൂടെ രണ്ടാമത്തെ ഗോളും പിറന്നു. ഇത്തവണ പന്ത് വലയിലാക്കിയത് കൊമ്പന്മാരുടെ സ്പാനിഷ് ഫോർവേഡ‍് ആണെന്ന് മാത്രം.
ബ്ലാസ്റ്റേഴ്സിന്റെ ആധിപത്യം അധികം വൈകാതെ അവസാനിച്ചു. 29-ാം മിനിറ്റിൽ ഒഡീഷ ആദ്യ ഗോൾ തിരിച്ചടിച്ചു. ഒ‍ഡീഷയ്ക്ക് അനുകൂലമായി ലഭിച്ച കോർണർ കിക്ക് അഹമ്മദ് ജാഹോ വലയിലേക്ക് തൊടുത്തു. തടയാൻ ശ്രമിച്ച ബ്ലാസ്റ്റേഴ്സ് താരം അലക്സാണ്ട്രേ കോഫിന്റെ കാലിൽ നിന്നും പന്ത് വലയിലായി. 36-ാം മിനിറ്റിൽ ഡീഗോ മൗറീഷ്യോ ഒഡീഷയ്ക്കായി സമനില ഗോൾ നേടി.
ആദ്യ പകുതിയിൽ ഇരുടീമുകളും രണ്ട് ഗോൾ വീതം നേടി സമനില പാലിച്ചു. രണ്ടാം പകുതിയിൽ വിജയത്തിനായി ബ്ലാസ്റ്റേഴ്സും ഒഡീഷയും ഒരുപോലെ ശ്രമിച്ചെങ്കിലും ആർക്കും ഗോൾവല ചലിപ്പിക്കാൻ കഴിഞ്ഞില്ല. ഒടുവിൽ ലോങ് വിസിൽ മുഴങ്ങിയപ്പോൾ സ്കോർ നില 2-2 എന്ന് അവസാനിച്ചു. നാല് മത്സരങ്ങളിൽ നിന്നായി ഒരു ജയവും രണ്ട് സമനിലയും ഒരു തോൽവിയുമാണ് ബ്ലാസ്റ്റേഴ്സ് ഇതുവരെ നേടിയത്. അഞ്ച് പോയിന്റോടെ ടേബിളിൽ നാലാമതാണ് ബ്ലാസ്റ്റേഴ്സിന്റെ സ്ഥാനം.
