Get the latest news at
your fingertips!
Download our app now
LIVE TV
Search
ഉത്തേജക മരുന്ന് ഉപയോഗിച്ചതിന് ഫ്രഞ്ച് മിഡ്ഫീല്‍ഡറും ലോകകപ്പ് ജേതാവുമായ പോള്‍ പോഗ്ബയുടെ വിലക്ക് വെട്ടിക്കുറച്ചു. നാല് വര്‍ഷത്തേക്ക് ലഭിച്ച വിലക്ക് 18 മാസമായാണ് വെട്ടിക്കുറച്ചത്. കോര്‍ട്ട് ഓഫ് ആര്‍ബിട്രേഷന്‍ ഫോര്‍ സ്‌പോര്‍ട്‌സില്‍ (സിഎഎസ്) നല്‍കിയ അപ്പീല്‍ വിജയിച്ചതിനെ തുടര്‍ന്നാണ് യുവന്റസ് താരം കൂടിയായ പോഗ്ബയുടെ വിലക്ക് കുറച്ചത്. ഇതോടെ ജനുവരിയിൽ യുവൻ്റസിനൊപ്പം പരിശീലനം ആരംഭിക്കാനും മാർച്ചോടെ ഔദ്യോഗിക മത്സരങ്ങൾ കളിക്കാനും പോഗ്ബയ്ക്ക് സാധിക്കും.
ഫെബ്രുവരി അവസാനമാണ് ഉത്തേജക മരുന്ന് ഉപയോഗിച്ചതായി സ്ഥിരീകരിച്ചതിനെ തുടര്‍ന്ന് പോള്‍ പോഗ്ബയ്ക്ക് വിലക്ക് ഏര്‍പ്പെടുത്തിയത്. 2023 ഓഗസ്റ്റ് 20ന് നടത്തിയ പരിശോധനയില്‍ താരം പോസിറ്റീവാണെന്ന് കണ്ടെത്തിയതിനെ തുടര്‍ന്നായിരുന്നു നടപടി. നിരോധിത പദാര്‍ത്ഥമായ ടെസ്റ്റോസ്റ്റിറോണാണ് പോഗ്ബയുടെ ശരീരത്തില്‍ കണ്ടെത്തിയതെന്നാണ് റിപ്പോര്‍ട്ട്. പിന്നാലെ 2027 ഓഗസ്റ്റ് വരെ താരത്തെ സസ്‌പെന്‍ഡ് ചെയ്യുകയായിരുന്നു.
ഈ സസ്‌പെന്‍ഷന്‍ യുവന്റസ് താരമായ പോഗ്ബയുടെ കരിയറില്‍ വലിയ തിരിച്ചടി സൃഷ്ടിച്ചിരുന്നു. 2027 ഓഗസ്റ്റില്‍ വിലക്ക് അവസാനിക്കുമ്പോള്‍ 34 വയസ്സാവുന്ന പോഗ്ബയുടെ തിരിച്ചുവരവ് തന്നെ സംശയത്തിലായിരുന്നു. ഫ്രഞ്ച് മിഡ്ഫീല്‍ഡറുടെ കരിയര്‍ അവസാനിച്ചെന്നുവരെ അഭ്യൂഹങ്ങള്‍ ഉയര്‍ന്നിരുന്നു.
എന്നാല്‍ തനിക്കെതിരായ നടപടിക്കെതിരെ പോഗ്ബ സിഎഎസില്‍ അപ്പീല്‍ ഫയല്‍ ചെയ്തു. പിന്നീടാണ് അനുകൂലമായ വിധി വന്നത്. സിഎഎസ് വിധിപ്രകാരം പോഗ്ബയ്ക്ക് 2025 മാര്‍ച്ചില്‍ യുവന്റസിന് വേണ്ടി വീണ്ടും കളത്തിലിറങ്ങാന്‍ സാധിക്കും. ഇതോടെ യുവന്റസിലേക്കുള്ള പോഗ്ബയുടെ തിരിച്ചുവരവിന് വഴിയൊരുങ്ങുകയും ഫുട്‌ബോളില്‍ നിന്ന് വിരമിക്കുമെന്ന ഊഹാപോഹങ്ങള്‍ അവസാനിക്കുകയും ചെയ്തു.
2018ല്‍ ഫ്രാന്‍സ് ഫിഫ ലോകകപ്പ് ഉയര്‍ത്തുമ്പോള്‍ ടീമിലെ പ്രധാന താരങ്ങളില്‍ ഒരാളായിരുന്നു പോഗ്ബ. എന്നാല്‍ 2022 ലോകകപ്പില്‍ പരിക്കിനെ തുടര്‍ന്ന് അദ്ദേഹത്തിന് കളിക്കാന്‍ സാധിച്ചിരുന്നില്ല. ഫ്രഞ്ച് കുപ്പായത്തില്‍ 91 മത്സരങ്ങളില്‍ നിന്ന് 11 ഗോളുകളാണ് പോഗ്ബയുടെ ബൂട്ടുകളില്‍ നിന്ന് പിറന്നത്.
2011-12ല്‍ മാഞ്ചസ്റ്റര്‍ യുണൈറ്റഡിലാണ് പോഗ്ബ അരങ്ങേറുന്നത്. 2012ല്‍ യുവന്റസിലെത്തിയ പോഗ്ബ 2016ല്‍ വീണ്ടും യുണൈറ്റഡിലേക്ക് തിരിച്ചെത്തി. ആറ് വര്‍ഷത്തിന് ശേഷം വീണ്ടും യുവന്റസിലേക്ക് കൂടുമാറി. പിന്നീടായിരുന്നു ഉത്തേജക മരുന്നുപരിശോധനയില്‍ പരാജയപ്പെട്ടതും നടപടി വന്നതും.
Content Highlights: Paul Pogba doping ban reduced from 4 years to 18 months
