അര്‍ജന്റീനയ്‌ക്കൊപ്പം കളിക്കുന്നത് എപ്പോഴും സന്തോഷം; പ്രതികരണവുമായി ലയണൽ മെസ്സി

ഇത് എന്റെ അവസാന മത്സരങ്ങളാണെന്ന് എനിക്ക് അറിയാമെന്നും സൂപ്പർ താരം

റിപ്പോർട്ടർ നെറ്റ്‌വര്‍ക്ക്‌

1 min read|16 Oct 2024, 09:13 am

അര്‍ജന്റീനയ്‌ക്കൊപ്പം കളിക്കുന്നത് എപ്പോഴും സന്തോഷമാണെന്ന് ലയണൽ മെസ്സി. 2026 ഫിഫ ലോകകപ്പ് യോഗ്യത മത്സരത്തിൽ ബൊളീവിയയെ പരാജയപ്പെടുത്തിയതിന് ശേഷമാണ് സൂപ്പർ താരത്തിന്റെ പ്രതികരണം. ഇവിടെ ആരാധകരുടെ സ്നേഹം അനുഭവിക്കാൻ കഴിയുന്നു. അവർ എന്റെ പേര് വിളിച്ചുപറയുന്നത് എനിക്ക് മുന്നോട്ടുപോകാൻ‌ ആവേശമാണ്. അര്‍ജന്റീനയ്‌ക്കൊപ്പം എത്രകാലം ഉണ്ടാകുമെന്ന കാര്യത്തിൽ എനിക്ക് ഒരു ദിവസം പറയാൻ കഴിയില്ല. ഇപ്പോൾ ഈ ടീമിനൊപ്പം ആസ്വദിച്ചു കളിക്കാനാണ് ആഗ്രഹിക്കുന്നത്. ഇത് എന്റെ അവസാന മത്സരങ്ങളാണെന്ന് എനിക്ക് അറിയാം. അതിനാൽ കൂടുതൽ സമയം അര്‍ജന്റീനയ്‌ക്കൊപ്പം കളിക്കാനാണ് ഞാൻ ആഗ്രഹിക്കുന്നത്. ലയണൽ മെസ്സി പറഞ്ഞു

അര്‍ജന്റീനയ്‌ക്കൊപ്പമായിരിക്കാനാണ് ഞാൻ ഇഷ്ടപ്പെടുന്നത്. അതാണ് എന്നെ മുന്നോട്ട് നയിക്കുന്നത്. എവിടെയാണെങ്കിലും അത് ആസ്വദിക്കാൻ കഴിയണം. എന്റെ പ്രായത്തേക്കാൾ ഞാൻ ഇവിടെ ആയിരിക്കുമ്പോൾ ഒരു കുട്ടിയെപ്പോലെ തോന്നുന്നു. ഞാൻ ഈ ടീമിനൊപ്പം ഞാൻ സന്തോഷിക്കുന്നു. എത്രകാലം ഈ ടീമിൽ തുടരാനും മികച്ച പ്രകടനം നടത്താനും കഴിയുമോ അത്രയും കാലം ആരാധകർക്കൊപ്പം അത് ആസ്വദിക്കണമെന്നും മെസ്സി വ്യക്തമാക്കി.

ബൊളീവിയയ്ക്കെതിരായ ലോകകപ്പ് യോഗ്യതാ മത്സരത്തിൽ എതിരില്ലാത്ത ആറ് ഗോളുകൾക്കാണ് അർജന്റീനയുടെ വിജയം. മത്സരത്തിൽ ഹാട്രിക്ക് ഗോളുകൾ നേടിയ സൂപ്പർ താരം രണ്ട് അസിസ്റ്റുകളും നൽകി. ഇതോടെ കരിയറിൽ ആകെ 846 ഗോളുകളാണ് മെസ്സി നേടിയിരിക്കുന്നത്. അർജന്റീനയ്ക്കായി 112 ഗോളുകളും 57 അസിസ്റ്റുകളും മെസ്സി നേടിക്കഴിഞ്ഞു.