LIVE TV
ഇന്ത്യൻ സൂപ്പർ ലീഗിൽ ഒഡീഷ എഫ് സിയെ തോൽപ്പിച്ച് നോർത്ത് ഈസ്റ്റ് യുണൈറ്റഡ്. ഇരുടീമുകളും മത്സരിച്ച് ഗോളുകൾ അടിച്ച മത്സരത്തിൽ രണ്ടിനെതിരെ മൂന്ന് ഗോളുകൾക്കാണ് നോർത്ത് ഈസ്റ്റിന്റെ വിജയം. അലെദീൻ അജറൈ നോർത്ത് ഈസ്റ്റിനായി ഇരട്ട ഗോളുകൾ നേടി. ഗില്ലെർമോ ഫെർണാണ്ടസ് ആണ് മറ്റൊരു ഗോൾ നേടിയത്. ഒഡീഷയ്ക്കായി ഹ്യൂഗോ ബോമസും ഡീഗോ മൗറീഷ്യോസും വല ചലിപ്പിച്ചു.
മുൻ മത്സരങ്ങളിലേതിന് സമാനമായി ആദ്യ പകുതിയിൽ നോർത്ത് ഈസ്റ്റ് എതിരാളികൾക്ക് മേൽ ആധിപത്യം സൃഷ്ടിച്ചു. പാർഥിബ് ഗൊഗോയി, നെസ്റ്റർ ആൽബിയാച്ച്, ജിതിൻ എം എസ്, അലെദീൻ അജറൈ തുടങ്ങിയ നോർത്ത് ഈസ്റ്റ് താരങ്ങൾ തുടച്ചയായി ഒഡീഷ ഗോൾമുഖം വിറപ്പിച്ചുകൊണ്ടിരുന്നു. 12-ാം മിനിറ്റിൽ അജറൈയുടെ വലംകാൽ ഷോട്ട് ഒഡീഷ ഗോൾകീപ്പർ അമരീന്ദർ സിങ്ങിനെ മറികടന്ന് വല ചലിപ്പിച്ചു. 40-ാം മിനിറ്റിൽ വീണ്ടും അജറൈയുടെ ഗോളിൽ നോർത്ത് ഈസ്റ്റ് 2-0ത്തിന് മുന്നിലെത്തി.
രണ്ടാം പകുതിയിൽ 60-ാം മിനിറ്റിലാണ് ഒഡീഷയുടെ ആദ്യ ഗോൾ പിറന്നത്. ഹ്യൂഗോ ബോമസായിരുന്നു വല ചലിപ്പിച്ചത്. പിന്നാലെ 71-ാം മിനിറ്റിൽ ഗില്ലെർമോ ഫെർണാണ്ടസിന്റെ ഗോളിൽ നോർത്ത് ഈസ്റ്റ് ലീഡ‍് 3-1 ആക്കി ഉയർത്തി. 83-ാം മിനിറ്റിൽ ഡീഗോ മൗറീഷ്യോസിന്റെ ഗോളിൽ ഒഡീഷ ഒരിക്കൽ കൂടി മത്സരത്തിലേക്ക് തിരികെ വരാൻ ശ്രമിച്ചു. എങ്കിലും ലോങ് വിസിൽ മുഴങ്ങിയപ്പോൾ 3-2 എന്ന സ്കോറിൽ ഒഡീഷയ്ക്ക് തോൽവി സമ്മതിക്കേണ്ടി വന്നു.
Content Highlights: Ajaraie shines again as NorthEast United sink Odisha FC in five-goal thriller
