ഏഷ്യൻ ചാമ്പ്യൻസ് ട്രോഫി ഹോക്കി: മലേഷ്യയെ 8-1ന് തകർത്ത് ഇന്ത്യ

രാജ്കുമാര്‍ പാലിന്റെ ഹാട്രിക് മികവിലാണ് നീലപ്പട വമ്പൻ വിജയം സ്വന്തമാക്കിയത്.

റിപ്പോർട്ടർ നെറ്റ്‌വര്‍ക്ക്‌

1 min read|11 Sep 2024, 04:27 pm

ഏഷ്യൻ ചാമ്പ്യൻസ് ട്രോഫി ഹോക്കിയിൽ തകർപ്പൻ ജയവുമായി ഇന്ത്യ. മലേഷ്യയ്ക്കെതിരായ മത്സരത്തിൽ ഒന്നിനെതിരെ എട്ട് ഗോളുകൾക്ക് ഇന്ത്യൻ സംഘം വിജയിച്ചു. രാജ്കുമാർ പാലിന്റെ ഹാട്രിക് മികവിലാണ് നീലപ്പട വമ്പൻ വിജയം സ്വന്തമാക്കിയത്. അർജീത് സിംഗ് ഹുണ്ടൽ ഇരട്ട ഗോളും നേടി. ക്യാപ്റ്റൻ‌ ഹർമ്മൻപ്രീത് സിംഗ്, ഉത്തം സിംഗ്, ജുഗരാജ് സിംഗ് എന്നിവർ ഇന്ത്യയ്ക്കായി മറ്റ് ഗോളുകൾ വലയിലെത്തിച്ചു. ഹക്കിമുള്ളാഹ് മലേഷ്യയുടെ ആശ്വാസ ഗോൾ നേടി.

മത്സരത്തിന്റെ മൂന്നാം മിനിറ്റിൽ തന്നെ ഇന്ത്യയുടെ ആദ്യ ഗോൾ പിറന്നു. രാജ്കുമാർ പാലാണ് നിലവിലെ ഏഷ്യൻ‌ ചാമ്പ്യന്മാർക്കായി ഗോൾവേട്ടയ്ക്ക് തുടക്കമിട്ടത്. ആറാം മിനിറ്റിൽ അർജീത് സിംഗിലൂടെ ഇന്ത്യ രണ്ടാം ഗോളും വലയിലെത്തിച്ചു. ജുഗരാജ് സിംഗിലൂടെ ഇന്ത്യ എതിരില്ലാത്ത മൂന്ന് ഗോളിന് മുന്നിലെത്തുമ്പോൾ മത്സരം വെറും ഏഴ് മിനിറ്റ് മാത്രമാണ് പിന്നിട്ടത്.

നാലാം ഗോളിനായി ഇന്ത്യയ്ക്ക് 22-ാം മിനിറ്റ് വരെ കാത്തിരിക്കേണ്ടി വന്നു. ഇത്തവണ ക്യാപ്റ്റൻ ഹർമൻപ്രീത് സിംഗാണ് ഗോൾവല ചലിപ്പിച്ചത്. തൊട്ടുപിന്നാലെ 24-ാം മിനിറ്റിൽ രാജ്കുമാർ പാലും ഗോൾ നേടി. ആദ്യ പകുതിയിൽ ഇന്ത്യ എതിരില്ലാത്ത അഞ്ച് ഗോളിന് മുന്നിലായിരുന്നു. രണ്ടാം പകുതിയിൽ 33-ാം മിനിറ്റിൽ രാജ്കുമാർ പാൽ തന്റെ ഹാട്രിക് പൂർത്തിയാക്കി. ഇന്ത്യ എതിരില്ലാത്ത ആറ് ഗോളിന് മുന്നിലായി. പിന്നാലെ 34-ാം മിനിറ്റിൽ മലേഷ്യയുടെ ആശ്വാസ ഗോൾ പിറന്നു. ഹക്കിമുള്ളാഹ് മലേഷ്യയ്ക്കായി ഗോൾ നേടി.

39-ാം മിനിറ്റിൽ അർജീത് സിംഗ് രണ്ടാമതും ഗോൾ നേട്ടം സ്വന്തമാക്കി. മത്സരത്തിൽ ഇന്ത്യൻ സംഘത്തിന്റെ ഏഴാം ഗോൾ. തൊട്ടുപിന്നാലെ 41-ാം മിനിറ്റിൽ ഉത്തം സിംഗ് ഗോൾവല ചലിപ്പിച്ചു. ഏഷ്യൻ ചാമ്പ്യൻസ് ട്രോഫിയിൽ ഇന്ത്യ ഇതുവരെ കളിച്ച മൂന്ന് മത്സരങ്ങളും വിജയിച്ചു. ജപ്പാനെ ഒന്നിനെതിരെ അഞ്ച് ഗോളുകൾക്കും ചൈനയെ എതിരില്ലാത്ത മൂന്ന് ഗോളുകൾക്കും ഇന്ത്യൻ ടീം തകർത്തെറിഞ്ഞു.