Get the latest news at
your fingertips!
Download our app now
LIVE TV
Search
ഏഷ്യൻ ചാംപ്യൻസ് ട്രോഫി ഹോക്കിയിൽ ഇന്ത്യയ്ക്ക് അഞ്ചാം കിരീടം. ഫൈനലിൽ ചൈനയെ എതിരില്ലാത്ത ഒരു ഗോളിന് തോൽപ്പിച്ചാണ് ഇന്ത്യ കിരീട നേട്ടത്തില്‍ റെക്കോർഡിട്ടത്. ഏഷ്യൻ ചാംപ്യൻസ് ഹോക്കി ചരിത്രത്തിൽ അഞ്ച് കിരീടം നേടിയ ഏക ടീം ഇന്ത്യയാണ്. മൂന്ന് കിരീടങ്ങളുള്ള പാകിസ്താനാണ് രണ്ടാം സ്ഥാനത്തുള്ളത്. ഇന്ന് നടന്ന ലൂസേഴ്സ് ഫൈനലിൽ ദക്ഷിണ കൊറിയയെ രണ്ടിനെതിരെ അഞ്ച് ഗോളുകൾക്ക് പരാജയപ്പെടുത്തി പാകിസ്താൻ മൂന്നാം സ്ഥാനം സ്വന്തമാക്കി.
മുൻ മത്സരങ്ങളിൽ എതിരാളികളുടെമേൽ ആധിപത്യം സൃഷ്ടിച്ച ഇന്ത്യൻ ടീമിന് ഫൈനലിൽ കടുത്ത വെല്ലുവിളിയാണ് നേരിടേണ്ടി വന്നത്. ആദ്യ മൂന്ന് ക്വാർട്ടറുകളിലും ഇന്ത്യൻ താരങ്ങൾ ഗോളടിച്ചില്ല. ചൈനയുടെ ശ്രമങ്ങളെ പരാജയപ്പെടുത്താൻ കഴിഞ്ഞത് ഇന്ത്യൻ സംഘത്തിന് ആശ്വാസമായി. ഒടുവിൽ 51-ാം മിനിറ്റിൽ ഇന്ത്യയ്ക്കായി യുഗരാജ് സിങ്ങ് വിജയഗോൾ നേടി.
ആദ്യ ക്വാർട്ടറിൽ ഇരുടീമുകളും ഒപ്പത്തിനൊപ്പം മുന്നേറ്റം നടത്തി. ഇന്ത്യൻ ഗോൾകീപ്പർ കൃഷൻ പഥകിന്റെയും ചൈനയുടെ കാവൽക്കാരൻ വാങ് വെയ് ഹാവോയുടെയും സേവുകളായിരുന്നു ആദ്യ പകുതിയുടെ ഹൈലൈറ്റ്. രണ്ടാം പകുതിയിൽ ഇന്ത്യ കൂടുതൽ മുന്നേറ്റങ്ങൾ നടത്തി. എന്നാൽ ഒരിക്കൽ പോലും പന്ത് ഗോൾലൈൻ കടത്താൻ കഴിഞ്ഞില്ല.
രണ്ട് ക്വാർട്ടറുകൾ പിന്നിടുമ്പോൾ ഇന്ത്യ മത്സരത്തിലെ 84 ശതമാനം സമയവും പന്തിനെ നിയന്ത്രിച്ചു. എന്നാൽ മൂന്നാം ക്വാർട്ടറിൽ ഇന്ത്യൻ ഗോൾമുഖത്തേയ്ക്ക് ചൈനീസ് താരങ്ങൾ നിരന്തരമായ ആക്രമണം നടത്തി. എങ്കിലും മൂന്നാം പകുതിയും ഗോൾ രഹിതമായി അവസാനിച്ചു. ഒടുവിൽ അവസാന ക്വാർട്ടറിൽ 51-ാം മിനിറ്റിലാണ് മത്സരത്തിന്റെ വിധി നിർണയിച്ച ഗോൾ പിറന്നത്. ഹർമൻപ്രീത് സിങ്ങിന്റെ പാസിൽ യുഗരാജ് സിങ്ങാണ് ഇന്ത്യയ്ക്കായി ഗോൾ നേടിയത്. അവശേഷിച്ച മിനിറ്റിൽ ചൈനയ്ക്ക് തിരിച്ചടിക്കാൻ കഴിയാതെ വന്നതോടെ ഇന്ത്യ 1-0ന് ഏഷ്യൻ ഹോക്കിയുടെ രാജാക്കന്മാരായി.
