Get the latest news at
your fingertips!
Download our app now
LIVE TV
Search
ന്യൂഡൽഹി: കുടിയേറ്റം കുറയ്ക്കുന്നതിനുള്ള നടപടികളുമായി ബ്രിട്ടീഷ് സർക്കാർ. ടോറി എംപിമാരുടെ സമ്മർദ്ദത്തെത്തുടർന്ന് പ്രധാനമന്ത്രി ഋഷി സുനക് കുടിയേറ്റ തോത് ഗണ്യമായി കുറയ്ക്കുന്നതിനുള്ള നടപടികൾ പ്രഖ്യാപിച്ചു. വിദ്യാർത്ഥികൾക്കും തൊഴിലവസരങ്ങൾക്കായി യുകെയിലേക്ക് പോകാൻ ആഗ്രഹിക്കുന്നവർക്കും നിയന്ത്രണങ്ങൾ തിരിച്ചടിയാകും. "കുടിയേറ്റം വളരെ കൂടുതലാണ്. യുകെ ഗവൺമെന്റ് ഇത് നിയന്ത്രിക്കാൻ സമൂലമായ നടപടിയെടുക്കുകയാണ്. ഈ നടപടികൾ യുകെക്ക് ഗുണം ചെയ്യുമെന്ന് ഉറപ്പാക്കും. ചരിത്രത്തിൽ ഇതിന് മുമ്പ് ഒരു പ്രധാനമന്ത്രിയും ഇത് ചെയ്തിട്ടില്ല". ഋഷി സുനക് എക്സിൽ വ്യക്തമാക്കി. പദ്ധതി 2024 തുടക്കത്തിൽ പ്രാബല്യത്തിൽ വരുമെന്നാണ് പ്രതീക്ഷ.
പ്രധാന നടപടികൾ
ആശ്രിത നിയന്ത്രണങ്ങൾ: കുടിയേറ്റം തടയുന്നതിനുള്ള സർക്കാർ ലക്ഷ്യത്തിന്റെ ഭാഗമായി, യുകെയിൽ പ്രവേശിക്കാൻ കഴിയുന്ന ആശ്രിതരുടെ എണ്ണം പരിമിതപ്പെടുത്താൻ സർക്കാർ ഉദ്ദേശിക്കുന്നു.
ശമ്പള പരിധി വർദ്ധിക്കുന്നു : ബ്രിട്ടീഷ് പൗരന്മാര്ക്കോ, രാജ്യത്ത് സ്ഥിരതാമസം ആക്കിയവര്ക്കോ വിദേശ രാജ്യങ്ങളില് നിന്ന് തൊഴിലാളികളെ എത്തിക്കണമെങ്കില് ഇനി കൂടുതല് തുക ശമ്പളമായി നല്കേണ്ടി വരും. വിദേശ തൊഴിലാളികളുടെ വരുമാന പരിധി ഏകദേശം 50% വരെ വർദ്ധിക്കും.
ഹെൽത്ത് ആന്റ് കെയർ വിസ പരിധികൾ: കെയർ വർക്കർമാർക്കും അവരുടെ ആശ്രിതർക്കും പ്രധാന മാർഗമായിരുന്ന ഹെൽത്ത് ആന്റ് കെയർ വിസയിൽ നിയന്ത്രണങ്ങൾ വരും. യുകെയിലേക്ക് ആശ്രിതരെ കൊണ്ടുവരാൻ വിദേശത്തുനിന്നുള്ള കെയർ വർക്കർമാരെ ഇനി അനുവദിക്കില്ല. കൂടാതെ കെയർ ക്വാളിറ്റി കമ്മീഷൻ നിയന്ത്രിക്കുന്ന പ്രവർത്തനങ്ങളിൽ ഉൾപ്പെടുന്ന കുടിയേറ്റ തൊഴിലാളികളെ മാത്രമേ കെയർ പ്രൊവൈഡർമാർക്ക് സ്പോൺസർ ചെയ്യാൻ കഴിയൂ.
ക്ഷാമ തൊഴിലുകൾക്കുള്ള(shortage occupations) 20% ശമ്പള കിഴിവ് സർക്കാർ നിർത്തലാക്കും. മൈഗ്രേഷൻ ഉപദേശക സമിതി അവലോകനം ചെയ്യുന്ന ഒരു ഇമിഗ്രേഷൻ ശമ്പള പട്ടിക അവതരിപ്പിക്കുകയും ചെയ്യും.
ആശ്രിതരെ കൊണ്ടുവരുന്ന വിദ്യാർത്ഥികൾക്ക് നിയന്ത്രണങ്ങൾ: യുകെയിലേക്ക് ആശ്രിതരെ കൊണ്ടുവരുന്ന വിദ്യാർത്ഥികളുടെ വർദ്ധനവ് പരിഹരിക്കുന്നതിനുള്ള നടപടികൾ ഇതിനകം തന്നെ നിലവിലുണ്ട്. ഇതിൽ കൂടുതൽ നിയന്ത്രണങ്ങൾ വരും. ഫാമിലി വിസയ്ക്കുള്ള ഏറ്റവും കുറഞ്ഞ വരുമാനം ഉയർത്തിയിട്ടുണ്ട്.
