'ഞാനൊരു അമേരിക്കക്കാരി ആയിരുന്നെങ്കിൽ ട്രംപിന് വോട്ട് ചെയ്യുമായിരുന്നു'; അഭിനന്ദിച്ച് കങ്കണ

ഡൊണാൾഡ് ട്രംപിനെ അഭിനന്ദിച്ച് ബോളിവുഡ് നടി കങ്കണ റണാവത്ത്

റിപ്പോർട്ടർ നെറ്റ്‌വര്‍ക്ക്‌

2 min read|06 Nov 2024, 07:43 pm

ന്യൂഡൽഹി: അമേരിക്കൻ പ്രസിഡൻ്റ് തിരഞ്ഞെടുപ്പിൽ കമലാ ഹാരിസിനെതിരെ പരാജയപ്പെടുത്തി ചരിത്ര വിജയം നേടിയ ഡൊണാൾഡ് ട്രംപിനെ അഭിനന്ദിച്ച് ബോളിവുഡ് നടി കങ്കണ റണാവത്ത്. താനൊരു അമേരിക്കക്കാരിയായിരുന്നെങ്കിൽ ട്രംപിന് വോട്ട് ചെയ്യുമായിരുന്നുവെന്ന് അവർ ഇൻസ്റ്റഗ്രാമിൽ കുറിച്ചു. തിരഞ്ഞെടുപ്പ് പ്രചാരണത്തിനിടെയുണ്ടായ വധശ്രമത്തിൽ ട്രംപിന് പരിക്കേറ്റിരുന്നു. ആ സമയത്തുള്ള ഫോട്ടോയും കുറിപ്പിനോടൊപ്പം കങ്കണ പങ്കുവെച്ചിട്ടുണ്ട്. 'വെടിയേറ്റിട്ടും അതവഗണിച്ച് പ്രസംഗം തുടർന്നയാൾക്ക് ഞാൻ വോട്ട് ചെയ്യും', കങ്കണ കുറിച്ചു.

ലോകം ഉറ്റുനോക്കുന്ന അമേരിക്കൻ പ്രസിഡന്റ് തിരഞ്ഞെടുപ്പിൽ കേവല ഭൂരിപക്ഷമായ 270 ഇലക്ടറൽ വോട്ടുകൾ മറികടന്നാണ് റിപ്പബ്ലിക്കൻ സ്ഥാനാർത്ഥി ട്രംപിന്റെ വിജയം. ഡിസംബറിലാകും ഔദ്യോഗിക ഫലപ്രഖ്യാപനം നടക്കുക. ഇഞ്ചോടിഞ്ച് മത്സരം പ്രവചിച്ച അമേരിക്കൻ പ്രസിഡൻ്റ് തിരഞ്ഞെടുപ്പിൽ ഏകപക്ഷീയമെന്ന് പറയാവുന്ന നിലയിലായിരുന്നു ട്രംപിൻ്റെ മുന്നേറ്റം. വേട്ടെണ്ണൽ ആരംഭിച്ച് ആദ്യ മണിക്കൂറുകളിൽ സ്വിങ്ങ് സ്റ്റേറ്റുകളിൽ അടക്കം അപ്രതീക്ഷിത മുന്നേറ്റമാണ് ഡൊണാൾഡ് ട്രംപ് നടത്തിയത്.

സ്വിങ്ങ് സ്റ്റേറ്റുകളിൽ ട്രംപ് കാഴ്ചവെച്ച മികച്ച പ്രകടനം പ്രസിഡൻ്റ് തിരഞ്ഞെടുപ്പിൽ നി‍ർണായകമായി. ഇതുവരെ പുറത്തു വന്ന ഫലസൂചന പ്രകാരം സെനറ്റിലേയ്ക്കും ജനപ്രതിനിധി സഭയിലേയ്ക്കും റിപ്പബ്ലിക്കൻ പാർട്ടി വലിയ മുന്നേറ്റമാണ് നടത്തിയത്. സെനറ്റിൽ കേവല ഭൂരിപക്ഷം നേടിയ റിപ്പബ്ലിക്കൻ പാർട്ടി ജനപ്രതിനിധി സഭയിലും കേവല ഭൂരിപക്ഷത്തിലേയ്ക്ക് മുന്നേറുകയാണ്.

content highlights: Kangana Ranaut congratulates Donald Trump