Get the latest news at
your fingertips!
Download our app now
LIVE TV
Search
തിരുവനന്തപുരം: മാനവീയം വീഥിയില് വീണ്ടും സംഘര്ഷം. പൊലീസിന് നേരെ കല്ലേറുണ്ടായി. ഒരാള്ക്ക് പരിക്കേറ്റു. കല്ലെറിഞ്ഞയാള് ഉള്പ്പെടെ നാല് പേരെ മ്യൂസിയം പൊലീസ് കസ്റ്റഡിയിലെടുത്തു.
ഇന്നലെ രാത്രി 12 മണിയോടെയാണ് സംഘര്ഷമുണ്ടായത്. മൈക്ക് ഓഫ് ചെയ്തതുമായി ബന്ധപ്പെട്ട തര്ക്കമാണ് സംഘര്ഷത്തില് കലാശിച്ചത്. രണ്ട് സംഘങ്ങളായി തിരിഞ്ഞ് സംഘര്ഷത്തിലേര്പ്പെടുകയായിരുന്നു. കല്ലേറില് നെട്ടയം സ്വദേശി രാജിക്കാണ് പരിക്കേറ്റത്.
കഴിഞ്ഞദിവസങ്ങളിലും മാനവീയം വീഥിയില് കലാപരിപാടിക്കിടെ കൂട്ടത്തല്ലുണ്ടായിരുന്നു. കേരളീയം ആഘോഷം കൂടി നടക്കുന്നതിനാല് വലിയ തിരക്കായിരുന്നു തിരുവനന്തപുരം നഗരത്തില്. സംഘര്ഷത്തിന്റെ പശ്ചാത്തലത്തില് മാനവീയത്ത് കടുത്ത നിയന്ത്രണങ്ങള് ഏര്പ്പെടുത്തും.
കലാപരിപാടിയില് പങ്കെടുക്കുന്നവര്ക്ക് രജിസ്ട്രേഷന് നിര്ബന്ധമാക്കും. ഒരു സമയം ഒന്നില് കൂടുതല് കലാ പരിപാടികള് അനുവദിക്കരുത്. രാത്രി 12 മണിക്ക് ശേഷം കലാപരിപാടികള് പാടില്ല. 12 മണിക്ക് ശേഷം ഉച്ചഭാഷിണി നിരോധിക്കുന്നതടക്കമുള്ള നിയന്ത്രണങ്ങള് കൊണ്ടുവരാനാണ് നീക്കം.
