Get the latest news at
your fingertips!
Download our app now
LIVE TV
Search
തൃശൂർ: കരുവന്നൂർ കേസിൽ ഇ ഡി വേട്ടയാടുന്നുവെന്ന് സിപിഐഎം തൃശൂർ ജില്ലാ സെക്രട്ടറി എം എം വർഗീസ്. കേന്ദ്ര അന്വേഷണ ഏജൻസികളെ മൊത്തത്തിൽ പ്രതിപക്ഷത്തിനെതിരെ ഉപയോഗിക്കുകയാണെന്നും വിഷയത്തിൽ രാഷ്ട്രീയപരമായും നിയമപരമായും നീങ്ങുമെന്നും എം എം വർഗീസ് പറഞ്ഞു.
കരുവന്നൂര് ബാങ്ക് തട്ടിപ്പ് കേസുമായി ബന്ധപ്പെട്ട് ഇഡി സിപിഐഎമ്മിന്റെ സ്വത്ത് കണ്ടുകെട്ടിയതിനോട് പ്രതികരിക്കുകയായിരുന്നു എം എം വർഗീസ്. എം എം വര്ഗീസിന്റെ പേരിലുള്ള, 29.29 കോടി രൂപയുടെ സ്വത്താണ് ഇഡി കണ്ടുകെട്ടിയത്. പാര്ട്ടി ഓഫീസിനായി വാങ്ങിയ അഞ്ച് സെന്റ് ഭൂമിയും കണ്ടുകെട്ടിയവയുടെ പട്ടികയിൽ ഉള്പ്പെട്ടിരുന്നു. ഇതിനുപുറമെ പാര്ട്ടിയുടെ വിവിധ കമ്മിറ്റികളുടെ പേരിലുള്ള എട്ട് ബാങ്ക് അക്കൗണ്ടുകള് കൂടി മരവിപ്പിച്ചിരുന്നു. മരവിപ്പിച്ചതില് കരുവന്നൂര് ബാങ്കിലെ അഞ്ച് അക്കൗണ്ടുകളും ഉള്പ്പെടും. ഇതിനുപുറമെ സിപിഐഎം ഇരിങ്ങാലക്കുട ഏരിയ കമ്മിറ്റിയുടെ ഒരു അക്കൗണ്ട്, തൃശൂര് ജില്ലാ കമ്മിറ്റിയുടെ രണ്ട് അക്കൗണ്ടുകളും മരവിപ്പിച്ചിരുന്നു.
കരുവന്നൂരില് സിപിഐഎമ്മിന് രഹസ്യ അക്കൗണ്ടുകള് ഉണ്ട് എന്നായിരുന്നു ഇ ഡിയുടെ കണ്ടെത്തല്. അതോടൊപ്പം തൃശ്ശൂരിലെ മറ്റു ചില ബാങ്കുകളിലും അക്കൗണ്ടുകളുണ്ട് എന്നാണ് ആദായ നികുതി വകുപ്പ് വ്യക്തമാക്കിയത്. ഇതിന്റെ വിവരങ്ങള് തിരഞ്ഞെടുപ്പ് കമ്മീഷനും ആര്ബിഐക്കും ഇഡി നേരത്തെ കൈമാറിയിട്ടുണ്ട്.
കരുവന്നൂര് ബാങ്ക് തട്ടിപ്പ് കേസില് എം എം വര്ഗീസടക്കമുള്ള മുതിര്ന്ന നേതാക്കളെ ഇഡി നേരത്തെ ചോദ്യം ചെയ്തിരുന്നു. കേസില് ആദ്യ കുറ്റപത്രം നേരത്തെ ഇഡി കോടതിയില് സമര്പ്പിച്ചിരുന്നു. അടുത്ത ഘട്ടത്തിലേക്കുള്ള നടപടിയുടെ ഭാഗമായാണ് സ്വത്ത് കണ്ടുകെട്ടലും ബാങ്ക് അക്കൗണ്ട് മരവിപ്പിക്കലും.
