ഗെഹ്ലോട്ട് മികച്ച പോരാട്ടത്തിന് നേതൃത്വം നല്കിയോ?, നല്കി; പക്ഷെ അധികാരം നേടാന് കഴിയാതെ വീണു

മുഖ്യമന്ത്രി സ്ഥാനത്ത് നിന്ന് പടിയിറങ്ങുമ്പോള് എംഎല്എമാരുടെ എണ്ണം തീരെ കുറഞ്ഞുപോയി എന്ന പരിഭവം ഗെഹ്ലോട്ടിന് ഉണ്ടാവാനിടയില്ല.

റിപ്പോർട്ടർ നെറ്റ്‌വര്‍ക്ക്‌

1 min read|04 Dec 2023, 08:02 am

ജയ്പൂര്: രാജസ്ഥാന്റെ തിരഞ്ഞെടുപ്പ് ചരിത്രം എന്നത് മാറി മാറി വരുന്ന സര്ക്കാരുകളുടേതാണ്. ഈ ചരിത്രത്തെ മാറ്റിയെഴുതാനാണ് നിലവിലെ മുഖ്യമന്ത്രി അശോക് ഗെഹ്ലോട്ടും കോണ്ഗ്രസും ശ്രമിച്ചത്. മികച്ച പോരാട്ടം ബിജെപിക്ക് മുമ്പില് കാഴ്ചവച്ചെങ്കിലും അധികാരത്തിലേക്ക് എത്താന് കഴിയാതെ കോണ്ഗ്രസ് വീഴുകയായിരുന്നു.

ആഡംബര ബസുകള്, ഹോട്ടലുകളും ബുക്ക് ചെയ്തു? തെലങ്കാനയില് രണ്ടും കല്പ്പിച്ച് കോണ്ഗ്രസ്

199ല് 115 സീറ്റുകള് നേടിയാണ് ബിജെപി വിജയിച്ചത്. 69 സീറ്റുകളാണ് കോണ്ഗ്രസിന് ലഭിച്ചത്. പ്രാദേശിക കക്ഷികള് ഏഴ് സീറ്റുകളും സ്വതന്ത്രര് എട്ട് സീറ്റുകളും നേടി. 42.05% വോട്ട് ബിജെപി നേടിയപ്പോള് 39.28% വോട്ടാണ് കോണ്ഗ്രസിന് ലഭിച്ചത്.

പ്രതിപക്ഷത്തുള്ള ബിജെപി തിരഞ്ഞെടുപ്പിനെ നേരിടുമ്പോള് ബിജെപി വലിയ വിജയം നേടുകയും കോണ്ഗ്രസ് ദയനീയമായി പരാജയപ്പെടുകയും ചെയ്യുന്നതാണ് സംസ്ഥാനത്തെ തിരഞ്ഞെടുപ്പ് ശീലം. 2008ല് 120 സീറ്റും 2013ല് 163 സീറ്റും നേടിയായിരുന്നു ബിജെപിയുടെ വിജയം. 2008ല് 56 സീറ്റും 2013ല് 21 സീറ്റും മാത്രമാണ് കോണ്ഗ്രസിന് നേടാന് കഴിഞ്ഞിരുന്നത്. എന്നാല് ഇക്കുറി 69 സീറ്റുകള് നേടാന് കോണ്ഗ്രസിന് കഴിഞ്ഞു.

തെലങ്കാനയില് സര്ക്കാര് രൂപീകരിക്കാന് ഒരുങ്ങി കോണ്ഗ്രസ്; ഗവര്ണറെ കണ്ടു

അധികാരത്തിലെത്തിയ 2018ല് കോണ്ഗ്രസിന് 38.8% വോട്ടാണ് ലഭിച്ചത്. ഇക്കുറി 0.2% വോട്ട് വര്ധിപ്പിക്കാന് കോണ്ഗ്രസിന് കഴിഞ്ഞു. എന്നാല് അധികാരത്തില് തുടരാന് ഇത് പോരായിരുന്നു. നിരവധി പദ്ധതികളാണ് ഗെഹ്ലോട്ട് സര്ക്കാര് പ്രഖ്യാപിച്ചിരുന്നത്. കുറെയേറെ സീറ്റുകള് നിലനിര്ത്താന് ഗെഹ്ലോട്ടിന് കഴിഞ്ഞെങ്കിലും പതിവ് അധികാര മാറ്റ ശൈലിയെ മറികടന്ന് അധികാരത്തിലെത്താന് കഴിഞ്ഞില്ല. എങ്കിലും മുഖ്യമന്ത്രി സ്ഥാനത്ത് നിന്ന് പടിയിറങ്ങുമ്പോള് എംഎല്എമാരുടെ എണ്ണം തീരെ കുറഞ്ഞുപോയി എന്ന പരിഭവം ഗെഹ്ലോട്ടിന് ഉണ്ടാവാനിടയില്ല.