Get the latest news at
your fingertips!
Download our app now
LIVE TV
Search
ബെംഗളൂരു: രേണുക സ്വാമി കൊലക്കേസ് പ്രതി ദര്ശനെ ജയില് മാറ്റാന് കോടതി ഉത്തരവ്. ദര്ശനെ ഇന്ന് രാത്രി ബെല്ലാരി ജില്ലാ ജയിലിലേക്കാണ് മാറ്റുക. ജയിലില് പ്രത്യേക പരിഗണന ലഭിച്ചുവെന്ന കണ്ടെത്തലിന് പിന്നാലെയാണ് നടപടി.
ബെംഗളൂരു പരപ്പന അഗ്രഹാര ജയിലില് നിന്നാണ് മാറ്റം. കൂട്ടുപ്രതികളെ ധാര്വാഡ്, ശിവമോഗ, ബെലഗാവി, വിജയപുര സെന്ട്രല് ജയിലുകളിലേക്കും മാറ്റും. കേസിലെ ഒന്നാം പ്രതി പവിത്ര ഗൗഡ ഉള്പ്പടെ മൂന്ന് പ്രതികള് പരപ്പന അഗ്രഹാര ജയിലില് തുടരും.
കര്ണാടക മുഖ്യമന്ത്രി സിദ്ധരാമയ്യയുടെ നിര്ദേശ പ്രകാരം ദര്ശനെ ജയില് മാറ്റാനുള്ള നടപടികള് ജയില് വകുപ്പ് തിങ്കളാഴ്ച ആരംഭിച്ചിരുന്നു. പരപ്പന അഗ്രഹാര ജയിലില് ദര്ശന് വിഐപി പരിഗണന ലഭിക്കുന്നതിന്റെ തെളിവുകള് പുറത്തു വന്നതിനെ തുടര്ന്നായിരുന്നു നടപടി.
രണ്ട് ഗുണ്ടാ തലവന്മാര്ക്കൊപ്പം ചായയും സിഗരറ്റുമായി ജയില് വളപ്പില് കസേരയിട്ടിരുന്ന് സംസാരിക്കുന്ന ദര്ശന്റെ ചിത്രമാണ് കഴിഞ്ഞ ദിവസം പുറത്തു വന്നത്. തുടര്ന്ന് ജയില് വകുപ്പ് നടത്തിയ അന്വേഷണത്തില് മൂന്ന് കേസുകള് രജിസ്റ്റര് ചെയ്തിരുന്നു. ജയിലര്, സൂപ്രണ്ട് ഉള്പ്പടെ ഒമ്പത് ഉദ്യോഗസ്ഥരെ ജയില് വകുപ്പ് അന്വേഷണ വിധേയമായി സസ്പെന്ഡ് ചെയ്യുകയും ചെയ്തു. പരപ്പന അഗ്രഹാര ജയിലിന് പരിസരം ജനവാസ കേന്ദ്രമായതിനാല് ജയിലില് ജാമറിന്റെ ഫ്രീക്വന്സി കൂട്ടാനാവില്ലെന്നും ഇത് പ്രതികള് മുതലെടുക്കുകയാണെന്നും കര്ണാട ആഭ്യന്തര മന്ത്രി ജി പരമേശ്വര പറഞ്ഞിരുന്നു.
