Get the latest news at
your fingertips!
Download our app now
LIVE TV
Search
ന്യൂഡൽഹി: യുഎസ് സന്ദർശനത്തിനിടെ പ്രതിപക്ഷ നേതാവ് രാഹുൽ ഗാന്ധി നടത്തിയ പരാമർശങ്ങളെ വിമർശിച്ച് കേന്ദ്ര ആഭ്യന്തര മന്ത്രി അമിത് ഷാ. രാജ്യത്തെ വിഭജിക്കാൻ ശ്രമിക്കുന്ന ശക്തികൾക്കൊപ്പം നിൽക്കുന്നതും വിദേശത്ത് പോയി രാജ്യത്തെ അപകീർത്തിപ്പെടുത്തുന്നതും കോൺഗ്രസിന്റെ പതിവാണെന്നായിരുന്നു അമിത് ഷായുടെ പ്രതികരണം.
രാജ്യത്തെ വിഭജിക്കാൻ ഗൂഢാലോചന നടത്തുന്ന ശക്തികൾക്കൊപ്പം നിൽക്കുന്നതും രാജ്യവിരുദ്ധ പരാമർശങ്ങൾ നടത്തുന്നതും രാഹുൽ ഗാന്ധിക്കും കോൺഗ്രസിനും ഇപ്പോൾ ശീലമായി മാറി. അതിനി ജമ്മു കശ്മീരിലെ രാജ്യവിരുദ്ധ, സംവരണ വിരുദ്ധ നിലപാടാകട്ടെ, വിദേശ രാജ്യങ്ങളിൽ നടത്തുന്ന ദേശ വിരുദ്ധ പരാമർശമാകട്ടെ, രാഹുൽ ഗാന്ധി എപ്പോഴും രാജ്യത്തിന്റെ വികാരത്തെ വ്രണപ്പെടുത്താനും രാജ്യസുരക്ഷയെ തകർക്കാനുമാണ് ശ്രമിക്കുന്നത്, അമിത് ഷാ പറഞ്ഞു.
പ്രാദേശികത, മതം, ഭാഷാപരമായ വ്യത്യാസങ്ങൾ എന്നിവയുടെ അടിസ്ഥാനത്തിൽ ജനങ്ങൾക്കിടയിൽ ഭിന്നിപ്പുണ്ടാക്കുന്ന കോൺഗ്രസിന്റെ രാഷ്ട്രീയമാണ് രാഹുൽ ഗാന്ധിയുടെ വാക്കുകളിൽ പ്രതിഫലിക്കുന്നത്. രാജ്യത്ത് നിലനിൽക്കുന്ന സംവരണത്തിനെതിരെ സംസാരിച്ചതോടെ കോൺഗ്രസിന്റെ സംവരണ വിരുദ്ധ നിലപാട് ഒരിക്കൽ കൂടി രാഹുൽ ഗാന്ധി തുറന്നുകാണിച്ചു. മനസിലെ ചിന്തകൾ ഒടുവിൽ വാക്കുകളായി മാറിയെന്നും ഷാ എക്സിൽ പങ്കുവെച്ച കുറിപ്പിൽ കൂട്ടിച്ചേർത്തു. ബിജെപി ഉള്ളിടത്തോളം കാലം ആർക്കും സംവരണം നിർത്തലാക്കാനോ രാജ്യസുരക്ഷയെ തകർക്കാനോ സാധിക്കില്ലെന്ന് രാഹുൽ ഗാന്ധിയോട് പറയാൻ ആഗ്രഹിക്കുന്നുവെന്നും ഷാ കൂട്ടിച്ചേർത്തു.
യുഎസിലെ ജോർജ്ടൗൺ സർവകലാശാലയിൽ വിദ്യാർത്ഥികളുമായി സംസാരിക്കുന്നതിനിടെ ഇന്ത്യ ന്യായമുള്ള സ്ഥലമാകുമ്പോൾ സംവരണം റദ്ദാക്കുമെന്ന് രാഹുൽ ഗാന്ധി പറഞ്ഞിരുന്നു. സംവരണം എത്ര കാലം നിലനിൽക്കുമെന്ന വിദ്യാർത്ഥികളുടെ ചോദ്യത്തോട് പ്രതികരിക്കുകയായിരുന്നു രാഹുൽ ഗാന്ധി. സാമ്പത്തിക കണക്കുകൾ നോക്കുമ്പോൾ, ആദിവാസികൾക്ക് 100 രൂപയിൽ 10 പൈസ ലഭിക്കും; ദളിതർക്ക് 100 രൂപയിൽ 5 രൂപയും ഒബിസിക്ക് സമാനമായ സംഖ്യയും ലഭിക്കും. അവർക്ക് പങ്കാളിത്തം ലഭിക്കുന്നില്ല എന്നതാണ് വസ്തുതയെന്നും രാഹുൽ ഗാന്ധി പറഞ്ഞിരുന്നു.
പരാമർശം സംവരണ വിരുദ്ധമാണെന്ന് ചൂണ്ടിക്കാട്ടിയാണ് ബിജെപിയുൾപ്പെടെ രാഹുൽ ഗാന്ധിയെ വിമർശിച്ച് രംഗത്തെത്തിയത്. രാഹുൽ ഗാന്ധിയുടെ പരാമർശം അധികാരം ലഭിക്കാത്തതിലുള്ള അമർഷത്തിന്റെ പ്രതിഫലനമാണെന്നാണ് ബിജെപിയുടെ പ്രതികരണം. ലോക് ജൻശക്തി പാർട്ടി നേതാവ് ചിരാഗ് പസ്വാനും രാഹുൽഗാന്ധിക്കെതിരെ വിമർശനവുമായി രംഗത്തെത്തിയിരുന്നു. കോൺഗ്രസിന്റെ മനോഭാവമാണ് രാഹുൽ ഗാന്ധി തുറന്നുകാട്ടിയതെന്നായിരുന്നു അദ്ദേഹത്തിന്റെ വിമർശനം.
