Get the latest news at
your fingertips!
Download our app now
LIVE TV
Search
കേരളത്തിലെ ട്രാഫിക് നിയമലംഘനങ്ങളിൽ കാര്യമായ ഇടിവ് ഉണ്ടാവാൻ കാരണങ്ങളിൽ ഒന്ന് നിരത്തുകളിൽ സ്ഥാപിച്ച AI കാമറകളായിരുന്നു. മുൻ വർഷങ്ങളെ അപേക്ഷിച്ച് കേരളത്തിലെ നിയമലംഘനങ്ങൾ AI കാമറ വന്നതിന് ശേഷം കാര്യമായി കുറഞ്ഞത് രാജ്യം മുഴുവൻ ശ്രദ്ധേയമായിരുന്നു. നിയമലംഘനങ്ങളുടെ ചിത്രങ്ങൾക്കൊപ്പം പിഴ സംഖ്യയുടെ വിവരങ്ങളും വീടുകളിലേക്ക് എത്തുന്ന രീതിയിലായിരുന്നു എംവിഡി AI കാമറ സംവിധാനം സജ്ജീകരിച്ചിരുന്നത്.
ഇപ്പോഴിതാ കേരളത്തിന്റെ മാതൃക ഏറ്റെടുത്തിരിക്കുകയാണ് ഉത്തരേന്ത്യൻ സംസ്ഥാനമായ പഞ്ചാബ്. പഞ്ചാബിലെ മൊഹാലിയിൽ AI കാമറയുടെ ആദ്യഘട്ടം മുഖ്യമന്ത്രി ഭഗവന്ത് സിംഗ് മാൻ ഉദ്ഘാടനം ചെയ്തു. പൊലീസിലും മറ്റും അമ്മാവൻ ഉണ്ട്, ബന്ധുവുണ്ട് എന്നൊക്കെ പറഞ്ഞുകൊണ്ട് ഇനിമുതൽ നിയമലംഘനത്തിൽ നിന്ന് രക്ഷപ്പെടാൻ സാധിക്കില്ലെന്നും പഞ്ചാബ് മുഖ്യമന്ത്രി പറഞ്ഞു.
AI -പവർഡ് സിറ്റി സർവൈലൻസ് ആൻഡ് ട്രാഫിക് മാനേജ്‌മെന്റ് സിസ്റ്റം എന്ന പേരിലാണ് പുതിയ AI സംവിധാനം മൊഹാലിയിൽ പഞ്ചാബ് ആരംഭിച്ചത്. എസ്എഎസ് നഗറിലെ സെക്ടർ 79 ലെ സോഹാന പൊലീസ് സ്റ്റേഷനിലാണ് ആദ്യ ഘട്ടത്തിലെ ഉദ്ഘാടനം ആരംഭിച്ചത്. സുരക്ഷ വർദ്ധിപ്പിക്കുക, കുറ്റകൃത്യങ്ങൾ തടയുക, ഗതാഗത മാനേജ്‌മെന്റ് കാര്യക്ഷമമാക്കുക എന്നിവയാണ് പ്രധാന ലക്ഷ്യങ്ങൾ.
77 കോടി രൂപയാണ് ആദ്യഘട്ടത്തിലെ പദ്ധതി ചിലവ്. ഇന്റഗ്രേറ്റഡ് കമാൻഡ് ആൻഡ് കൺട്രോൾ സെന്ററിന് (ICCC) കീഴിൽ, മൊഹാലി പൊലീസ് എൻട്രി പോയിന്റുകൾ, ഇന്റർസെക്ഷനുകൾ, പൊതു ഇടങ്ങൾ എന്നിവയുൾപ്പെടെ പ്രധാന സ്ഥലങ്ങളിൽ ഓട്ടോമാറ്റിക് നമ്പർ പ്ലേറ്റ് റെക്കഗ്‌നിഷൻ (ANPR) സിസിടിവി ക്യാമറകളും ഫേഷ്യൽ റെക്കഗ്‌നിഷൻ സാങ്കേതികവിദ്യയും സ്ഥാപിച്ചിട്ടുണ്ട്. സുഗമമായ നിയന്ത്രണത്തിനായി അഡാപ്റ്റീവ് ട്രാഫിക് കൺട്രോൾ (ATC), വെഹിക്കിൾ-ആക്‌ച്വേറ്റഡ് കൺട്രോൾ (VAC) അധിഷ്ഠിത ട്രാഫിക് ലൈറ്റുകളും പുതിയ സംവിധാനത്തിൽ ഉണ്ട്.
നിലവിൽ, മൊഹാലിയിൽ 17 സ്ഥലങ്ങളിലായി 350 ക്യാമറകളുള്ള നിരീക്ഷണ ശൃംഖലയാണ് ഉള്ളത്. സിറക്പൂരിൽ 70 റേഡിയോ ഫ്രീക്വൻസി (RF) അധിഷ്ഠിത വയർലെസ് സിസിടിവികളും സ്ഥാപിച്ചിട്ടുണ്ട്. പട്യാല, ലുധിയാന , ഫത്തേഗഡ് സാഹിബ്, മറ്റ് നഗരങ്ങൾ എന്നിവിടങ്ങളിലും സമാനമായ AI അധിഷ്ഠിത നിരീക്ഷണ സംവിധാനങ്ങൾ അവതരിപ്പിക്കുമെന്ന് പഞ്ചാബ് ഡിജിപി പറഞ്ഞു.
175 ഓട്ടോമാറ്റിക് നമ്പർ പ്ലേറ്റ് റെക്കഗ്‌നിഷൻ (ANPR) കാമറകൾ, 50 റെഡ് ലൈറ്റ് വയലേഷൻ ഡിറ്റക്ഷൻ (RLVD) കാമറകൾ, 92 ബുള്ളറ്റ് കാമറകൾ, 18 PTZ (പാൻ, ടിൽറ്റ്, സൂം) കാമറകൾ, ഓവർ സ്പീഡ് കണ്ടെത്താനുള്ള 16 കാമറകൾ എന്നിവയാണ് പുതിയ നീരീക്ഷണ സംവിധാനത്തിൽ ഉൾപ്പെടുത്തിയിരിക്കുന്നത്.
Content Highlights: Punjab with Kerala model AI camera for Traffic violations
