LIVE TV
ഉപഭോക്താക്കളുടെ സുരക്ഷയ്ക്കായി പുതിയ ഫീച്ചറുമായി ഗൂഗിൾ പിക്സൽ. ഗൂഗിൾ പിക്സൽ അവരുടെ 6, 7, 9 സീരീസ് ഫോണുകളിലാണ് ഉപഭോക്തൃ സുരക്ഷ മുൻനിർത്തി സ്‌കാം ഡിറ്റക്ഷൻ സിസ്റ്റമെന്ന പുതിയ ഫീച്ചർ അവതരിപ്പിക്കുന്നത്. തട്ടിപ്പ് കോളുകൾ തിരിച്ചറിയുന്നതിനും ഉപയോക്താക്കൾക്ക് മുന്നറിയിപ്പ് നൽകുന്നതിനുമായി ഫോൺ ആപ്പ് ഇപ്പോൾ ഒരു തത്സമയ സ്‌കാം ഡിറ്റക്ഷൻ സിസ്റ്റം സംയോജിപ്പിച്ചിരിക്കുകയാണ്. ഗൂഗിളിൻ്റെ നൂതന AI, മെഷീൻ ലേണിംഗ് സാങ്കേതികവിദ്യകൾ പ്രയോജനപ്പെടുത്തി ഇൻകമിംഗ് കോളുകൾ തത്സമയം വിശകലനം ചെയ്യാൻ ഈ സവിശേഷത ഫീച്ചറിന് സാധിക്കും. കോളർ ഐഡി, ഫോൺ നമ്പർ പാറ്റേണുകൾ, കോളിൻ്റെ സ്വഭാവം തുടങ്ങിയ വിവിധ ഘടകങ്ങൾ സൂക്ഷ്മമായി പരിശോധിക്കുന്നതിലൂടെ സംശയാസ്പദമായ കോളുകൾ കൃത്യമായി കണ്ടെത്താനും ഫ്ലാഗ് ചെയ്യാനും ഈ ഫീച്ചറിന് കഴിയും.
ഫ്രോഡ് കോളാണ് വരുന്നതെന്ന് മനസ്സിലാക്കിയാൽ ഈ ഫീച്ചർ ഉപയോക്താക്കൾക്ക് അവരുടെ ഫോൺ സ്ക്രീനിൽ നേരിട്ട് ഒരു മുന്നറിയിപ്പ് നൽകും. ഈ സമയോചിതമായ മുന്നറിയിപ്പ് വിവേകമുള്ള തീരുമാനങ്ങൾ എടുക്കാനും തട്ടിപ്പുകൾക്ക് ഇരയാകാതിരിക്കാനും ഉപയോക്താക്കളെ പ്രാപ്തരാക്കുന്നു. 'ഉപഭോക്താക്കളുടെ സ്വകാര്യത പരിരക്ഷിക്കുന്നതിനും, ഫോണിലെ ഡാറ്റയുടെ മേലുള്ള നിയന്ത്രണം ഉപഭോക്താക്കൾക്ക് എപ്പോഴും ഉണ്ടെന്ന് ഉറപ്പാക്കുന്നതിനുമായി ഞങ്ങൾ സ്‌കാം ഡിറ്റക്ഷൻ സജ്ജീകരിച്ചിട്ടുണ്ട്. തട്ടിപ്പ് കണ്ടെത്താനുള്ള ഫീച്ചർ ഡിഫോൾട്ടായി ഓഫാണ്, ഭാവി കോളുകൾക്കായി ഇത് സജീവമാക്കണോ എന്ന് നിങ്ങൾക്ക് തീരുമാനിക്കാം’, എന്നാണ് ഗൂഗിൾ വ്യക്തമാക്കിയിരിക്കുന്നത്.
'ഏത് സമയത്തും എല്ലാ കോളുകൾക്ക് വേണ്ടിയും ഫോൺ ആപ്പ് സെറ്റിങ്ങ്സിൽ ഈ ഫീച്ചർ ഓഫാക്കിയിടാം. അല്ലെങ്കിൽ ഒരു പ്രത്യേക കോളിനിടയിലും നിങ്ങൾക്ക് ഇത് ഓഫാക്കാം. AI കണ്ടെത്തൽ മോഡലും അതിൻ്റെ പ്രോസസ്സിംഗും പൂർണ്ണമായും ഫോണിലാണ് സജ്ജീകരിച്ചിരിക്കുന്നത്. സംഭാഷണങ്ങളുടെ ഓഡിയോയോ ട്രാൻസ്‌ക്രിപ്ഷനോ ഫോണിൽ സംഭരിക്കുകയോ ഗൂഗിൾ സെർവറുകളിലേക്കോ മറ്റെവിടെയെങ്കിലുമോ അയയ്‌ക്കുകയോ കോളിന് ശേഷം വീണ്ടെടുക്കുകയോ ചെയ്യില്ലെ'ന്നും ഗൂഗിൾ വ്യക്തമാക്കിയിട്ടുണ്ട്. പിക്സൽ 9 ഉപകരണങ്ങളിൽ ജെമിനി നാനോയാണ് സ്‌കാം ഡിറ്റക്ഷൻ നൽകുന്നത്. Pixel 6, 7, 8a ഉപയോക്താക്കളെ സംബന്ധിച്ച് ഈ ഫീച്ചർ മറ്റ് വിപുലമായ ഗൂഗിൾ ഓൺ-ഡിവൈസ് മെഷീൻ ലേണിംഗ് മോഡലുകളെ ആശ്രയിച്ചാണിരിക്കുന്നത്.
Content Highlights: Scam detection feature rolling out to google pixel phones
