Get the latest news at
your fingertips!
Download our app now
LIVE TV
Search
കൊച്ചി: മകരവിളക്കിനോടനുബന്ധിച്ച് സന്നിധാനത്ത് തിരക്ക് വർധിച്ച സാഹചര്യത്തിൽ ജനുവരി 12ന് മുമ്പുതന്നെ സ്പോട്ട് ബുക്കിങ്ങിലടക്കം നിയന്ത്രണം ഏർപ്പെടുത്തുന്നത് പരിഗണിക്കണമെന്ന് ഹൈക്കോടതി. നിയന്ത്രണം നടപ്പാക്കുന്നത് സംബന്ധിച്ച് കൂടിയാലോചിച്ച് തീരുമാനമെടുക്കാൻ ജസ്റ്റിസ് അനിൽ കെ.നരേന്ദ്രൻ, ജസ്റ്റിസ് എസ്. മുരളി കൃഷ്ണ എന്നിവരടങ്ങുന്ന ഡിവിഷൻ ബെഞ്ച് നിർദേശിച്ചു.
പമ്പയിലെ സ്പോട്ട് ബുക്കിങ് നിലക്കലിലേക്ക് മാറ്റേണ്ടതുണ്ടെന്നും കോടതി നേരത്തെ അറിയിച്ചിരുന്നു.ശബരിമലയിൽ എത്തുന്നവരിൽ പലരും മകരവിളക്കിന് തൊഴുത് മടങ്ങാൻ വേണ്ടി അവിടെ തങ്ങുന്നതാണ് പ്രശ്നമാകുന്നതെന്ന് കോടതി കണ്ടെത്തി. വെർച്വൽ ക്യൂ, സ്പോട്ട് ബുക്കിങ് വഴി ഓരോ ദിവസവും എത്തുന്നതിനെക്കാൾ അധികം ഭക്തജനത്തിരക്കാണ് സന്നിധാനത്തുള്ളതെന്ന് കോടതി പറഞ്ഞു.
തങ്ങുന്നവരെ കൂടാതെ പരമ്പരാഗത പാതയിലൂടെ കൂടുതൽ പേർ എത്തുന്നുണ്ടോയെന്ന സംശയവുമുണ്ട്. ഇതാണ് നിയന്ത്രണം അനിവാര്യമാക്കുന്നത്. നിലവിൽ ദിവസം ഒരു ലക്ഷത്തിലധികം തീർത്ഥാടകരാണ് എത്തുന്നത്.
പരമ്പരാഗത പാതയിലൂടെ കടത്തിവിടാൻ മുക്കുഴി വരെ വാഹനത്തിൽ തീർത്ഥാടകരെ എത്തിക്കുന്ന സംഘങ്ങൾ പ്രവർത്തിക്കുന്നുണ്ടോയെന്ന കാര്യത്തിൽ ഇടുക്കി ജില്ലാ പൊലീസ് മേധാവിയുടെ റിപ്പോർട്ട് തേടിയിട്ടുണ്ട്.
Content Highlight : Makaravilak Festival; High Court wants control including spot booking
