Get the latest news at
your fingertips!
Download our app now
LIVE TV
Search
സിനിമ പ്രേമികൾ വളരെ ആവേശത്തോടെ കാത്തിരിക്കുന്ന ചിത്രങ്ങളിൽ ഒന്നാണ് അല്ലു അർജുൻ നായകനാകുന്ന പുഷ്പ 2. സുകുമാർ സംവിധാനം ചെയ്യുന്ന സിനിമ ഇതിനോടകം തന്നെ വാർത്തകളിൽ ഇടം പിടിച്ചു കഴിഞ്ഞു. ഇപ്പോഴിതാ സിനിമയുടെ മലയാളം പതിപ്പിന്റെ ഡബ്ബിങ് വിശേഷങ്ങളുമായി എത്തിയിരിക്കുകയാണ് അല്ലുവിന്റെ മലയാള ശബ്ദമായ സംവിധായകൻ ജിസ് ജോയ്. ചിത്രത്തിന്റെ ഡബ്ബിങ് ആരംഭിച്ചതായും ആദ്യ പകുതി പൂർത്തിയാക്കിയതായും അദ്ദേഹം പങ്കുവെച്ച വീഡിയോയിലൂടെ അറിയിച്ചു. അല്ലു അർജുൻ, ഫഹദ് ഫാസിൽ എന്നിവർ മികച്ച പ്രകടനമാണ് കാഴ്ചവെച്ചിരിക്കുന്നത്. ആദ്യഭാഗത്തേക്കാൾ മാസ് രംഗങ്ങൾക്ക് ഏറെ പ്രാധാന്യം നൽകുന്നതാണ് പുഷ്പ 2 എന്നും ജിസ് ജോയ് അഭിപ്രായപ്പെട്ടു.
'പുഷ്പ 2 വരുന്നതിന് ഞാനും കാത്തിരിക്കുകയായിരുന്നു. ആ കാത്തിരിപ്പിന് വിരാമമായി. പുഷ്പ 2 വിന്റെ ഡബ്ബിങ് നാല് ദിവസം മുന്നേ തുടങ്ങി. ആദ്യ പകുതി അവസാനിപ്പിക്കുന്ന സീനാണ് നിങ്ങൾ കാണുന്നത്. ഇനി രണ്ടാം പകുതിയുടെ ഡബ്ബിങ് രണ്ട് ദിവസത്തെ ബ്രേക്കിന് ശേഷം തുടങ്ങും. ഏറെ ആസ്വാദ്യകരമായി തോന്നി. ഒരു നാഷണൽ അവാർഡ് വിന്നർ എങ്ങനെ പെർഫോം ചെയ്യണം, ആ മെച്യൂരിറ്റിയിലാണ് അല്ലു അർജുൻ പെർഫോം ചെയ്തത്. ഓരോ സിനിമ കഴിയുമ്പോഴും അദ്ദേഹം വളരുകയാണ്. കഴിഞ്ഞ പ്രാവശ്യത്തേക്കാൾ ഒരുപാട് മാസ് സീനുകളുണ്ട്. നമ്മുടെ ഫഹദ് ഫാസിൽ പൊളിച്ചടുക്കി. നല്ല സ്ക്രീൻപ്ലേ, നല്ല പാട്ടുകൾ, രശ്‌മികയുടെ നല്ല പ്രകടനം, നല്ല സംവിധാനം, നല്ല ഛായാഗ്രഹണം, കൂടുതൽ പറയുന്നില്ല. സെക്കന്റ് ഹാഫിന് ശേഷം ബാക്കി അപ്ഡേറ്റ് നൽകാം,' ജിസ് ജോയ് പറഞ്ഞു.
#Pushpa2TheRule Malayalam dubbing for its first half has been completed, according to #AlluArjun's dubbing artist and director Jis Joy. The second half of the dubbing is set to start after a couple of days' break.#Pushpa2#Pushpa2TheRuleOnDec5th pic.twitter.com/DnNJ55L1Vb
— Friday Matinee (@VRFridayMatinee) November 2, 2024
ഡിസംബർ അഞ്ചിന് ലോകമെമ്പാടുമുള്ള തിയേറ്ററുകളിൽ പുഷ്പ റിലീസ് ചെയ്യും. നേരത്തെ ഡിസംബർ ആറിനായിരുന്നു ചിത്രത്തിന്റെ റിലീസ് തീയതി പ്രഖ്യാപിച്ചിരുന്നത്. പുഷ്പയുടെ തിയേറ്റർ അവകാശം വിറ്റഴിച്ചത് 600 കോടി രൂപയ്ക്കാണെന്നും ഓവർസീസിലൂടെ മാത്രം 125 കോടി രൂപ സ്വന്തമാക്കിയെന്നും ഇ ടൈംസ് മുൻപ് റിപ്പോർട്ട് ചെയ്തിരുന്നു. റിലീസിന് മുന്നേ തന്നെ ചിത്രം പ്രീ സെയിലിൽ 1,085 കോടി രൂപയുടെ നേട്ടമുണ്ടാക്കിയതായാണ് റിപ്പോർട്ടുകൾ. ഇ4 എൻ്റർടെയ്ൻമെൻ്റ്സ് ആണ് ചിത്രം കേരളത്തിൽ എത്തിക്കുന്നത്. വലിയ രീതിയിലുള്ള ആഘോഷങ്ങളാണ് ചിത്രത്തിന്റെ റിലീസിനോട് അനുബന്ധിച്ച് പദ്ധതിയിടുന്നത്.
Content Highlights: Jis Joy shares about Pushpa 2 dubbing updates
