Get the latest news at
your fingertips!
Download our app now
LIVE TV
Search
ആരാധകർ ഏറെ ആവേശത്തോടെ കാത്തിരിക്കുന്ന ചിത്രങ്ങളിൽ ഒന്നാണ് കണ്ണപ്പ. വിഷ്ണു മഞ്ചു നായകനാവുന്ന ചിത്രത്തിൽ ഇന്ത്യൻ സിനിമയിൽ നിന്നുള്ള നിരവധി താരങ്ങൾ അതിഥി വേഷത്തിൽ എത്തുന്നുണ്ട്. പാൻ ഇന്ത്യൻ സൂപ്പർ താരം പ്രഭാസ്, മലയാളത്തിന്റെ സ്വന്തം മോഹൻലാൽ. അക്ഷയ് കുമാർ, കാജൽ അഗർവാൾ, മോഹൻ ബാബു തുടങ്ങി നിരവധി പേരാണ് ചിത്രത്തിൽ എത്തുന്നത്.
തെലുങ്ക് സൂപ്പർ താരം മോഹൻബാബുവിന്റെ മകനാണ് വിഷ്ണു മഞ്ചു. മോഹൻബാബു തന്നെയാണ് ചിത്രം നിർമിക്കുന്നത്. കണ്ണപ്പയുടെ ചിത്രീകരണത്തിനിടെ നടൻ പ്രഭാസിന്റെ ഒരു ചിത്രം കഴിഞ്ഞ ദിവസം ചോർന്നിരുന്നു. അതീവ രഹസ്യമായി ചിത്രീകരിക്കുന്ന സിനിമയുടെ ലൊക്കേഷൻ ചിത്രം ചോർത്തിയവർക്കെതിരെ കടുത്ത നടപടിക്കൊരുങ്ങുകയാണ് ചിത്രത്തിന്റെ അണിയറ പ്രവർത്തകർ.
ലൊക്കേഷനിൽ നിന്ന് ചിത്രം ചോർത്തിയവരെ കണ്ടെത്തി തരുന്നവർക്ക് അഞ്ച് ലക്ഷം രൂപയുടെ പ്രതിഫലം പ്രഖ്യാപിച്ചിരിക്കുകയാണ് നടൻ വിഷ്ണു മഞ്ചു. ചോർന്ന ചിത്രത്തിൻറെ ഉറവിടം കണ്ടെത്തുന്നവർക്ക് 5 ലക്ഷം രൂപ പാരിതോഷികം നൽകുമെന്നും ഈ ദൃശ്യങ്ങൾ ആരും പങ്കുവെക്കരുതെന്നും വിഷ്ണു മഞ്ചു അഭ്യർത്ഥിച്ചു.
പ്രേക്ഷകർക്ക് സമാനതകളില്ലാത്ത ദൃശ്യാനുഭവം നൽകുന്നതിനായി ടീം ദിവസവും പകലും നടത്തുന്ന കഠിനാധ്വാനത്തിനെ തകർക്കുന്നതാണ് ഈ നടപടിയെന്നും വിഷ്ണു പറഞ്ഞു. ലീക്കായ ചിത്രം പ്രചരിപ്പിക്കുന്നവർക്കെതിരെ നിയമ നടപടി സ്വീകരിക്കുമെന്നും വിഷ്ണു വ്യക്തമാക്കി. ചിത്രം ചോർത്തിയവരെ കുറിച്ചുള്ള വിവരങ്ങൾ നേരിട്ട് 24 ഫ്രെയിംസ് ഫിലിം ഫാക്ടറിയുടെ അക്കൗണ്ടിലേക്ക് അയയ്ക്കാമെന്നും അവർക്ക് തക്കതായ പ്രതിഫലം നൽകുമെന്നും വിഷ്ണു അറിയിച്ചു.
An Urgent and Heartfelt Appeal from the Kannappa Team 🙏
— 24 Frames Factory (@24FramesFactory) November 9, 2024
కన్నప్ప టీమ్ నుంచి అత్యవసర, హృదయపూర్వక విజ్ఞప్తి 🙏 pic.twitter.com/Flx6mbchJR
സ്റ്റാർ പ്ലസിൽ സംപ്രേക്ഷണം ചെയ്ത മഹാഭാരതം സംവിധാനം ചെയ്ത മുകേഷ് കുമാർ സിംഗ് ആണ് കണ്ണപ്പ സംവിധാനം ചെയ്യുന്നത്. പ്രീതി മുകുന്ദനാണ് ചിത്രത്തിലെ നായിക. നേരത്തെ അല്ലു അർജുൻ നായകനാവുന്ന പുഷ്പ 2 വിലെയും രജനികാന്ത് - ലോകേഷ് കനകരാജ് ചിത്രമായ കൂലിയുടെയും ലൊക്കേഷൻ ചിത്രങ്ങളും വീഡിയോകളും സമാനമായ രീതിയിൽ ചോർന്നിരുന്നു.
Content Highlights: Kannappa location pic of Prabhas Leaked Actor Vishnu Manchu announce 5 lacks reward for tracing him
