LIVE TV
അശ്വത് മാരിമുത്തുവിന്റെ സംവിധാനത്തില്‍ നടൻ പ്രദീപ് രംഗനാഥൻ നായകനായ ചിത്രമാണ് ഡ്രാഗൺ. തിയേറ്ററിലെത്തിയ ചിത്രം മികച്ച പ്രതികരണങ്ങളും കളക്ഷനുമാണ് നേടുന്നത്. റിലീസ് ചെയ്ത് മൂന്ന് ദിനം പിന്നിടുമ്പോൾ ചിത്രത്തിന്റെ തമിഴ്നാട് ഗ്രോസ് കളക്ഷൻ 30 കോടിയിലേക്ക് അടുക്കുകയാണ്.
ആദ്യദിനത്തിൽ 5.75 കോടിയായിരുന്നു സിനിമ നേടിയതെങ്കിലും രണ്ടാം ദിനത്തിൽ അത് 10 കോടിയിലേക്ക് കുതിച്ചു. മൂന്നാം ദിനമായ ഇന്നലെ സിനിമ 13 കോടിയാണ് നേടിയത്. അങ്ങനെ മൂന്ന് ദിവസം കൊണ്ട് സിനിമയുടെ ഗ്രോസ് 28.75 കോടി കടന്നിരിക്കുകയാണ്. പ്രദീപ് രംഗനാഥൻ എന്ന സൂപ്പർതാരത്തിന്റെ ഉദയമാണ് ഡ്രാഗണിലൂടെ കാണുന്നത് എന്നാണ് അനലിസ്റ്റുകൾ പറയുന്നത്.
ലൗവ് ടുഡേ എന്ന ചിത്രത്തിന് ശേഷം പ്രദീപ് രംഗനാഥൻ നായകനായി എത്തുന്ന ചിത്രമാണ് ഡ്രാഗൺ. ഫെബ്രുവരി 21 ന് പ്രദർശനത്തിന് എത്തിയ സിനിമയിൽ അനുപമ പരമേശ്വരനാണ് നായിക. റൊമാന്റിക് കോമഡി ജോണറിൽ ആണ് സിനിമ. കയതു ലോഹർ, ഗൗതം വാസുദേവ് മേനോൻ, ജോർജ് മരിയൻ, കെ എസ് രവികുമാർ തുടങ്ങിയവരാണ് സിനിമയിലെ പ്രധാന അഭിനേതാക്കൾ.
വിജയ് സിനിമയായ ദി ഗോട്ടിന് ശേഷം എജിഎസ് എൻ്റർടൈയ്ൻമെൻ്റ് നിർമ്മിക്കുന്ന സിനിമയാണിത്. കൽപ്പാത്തി എസ് അഘോരം, കൽപ്പാത്തി എസ് ഗണേഷ്, കൽപ്പാത്തി എസ് സുരേഷ് എന്നിവരാണ് സിനിമയുടെ നിർമാതാക്കൾ. നികേത് ബൊമ്മി ഛായാഗ്രഹണം നിർവഹിക്കുന്ന സിനിമക്കായി സംഗീതമൊരുക്കുന്നത് ലിയോൺ ജെയിംസ് ആണ്. ഓ മൈ കടവുളേക്ക് ശേഷം അശ്വത് മാരിമുത്തു - ലിയോൺ ജെയിംസ് കോംബോ ഒന്നിക്കുന്ന സിനിമയാണ് ഡ്രാഗൺ.
Content Highlights: Dragon Day 3 Tamil Nadu Box Office
