Get the latest news at
your fingertips!
Download our app now
LIVE TV
Search
പേരിനൊപ്പം ലേഡി സൂപ്പർ സ്റ്റാർ എന്ന് ചേര്‍ത്തുവിളിക്കുന്നത് ഒഴിവാക്കണമെന്ന് ആവശ്യപ്പെട്ടുകൊണ്ട് നടി നയൻതാര കഴിഞ്ഞ ദിവസം രംഗത്തെത്തിയിരുന്നു. സ്ഥാനങ്ങള്‍
വിലമതിക്കാനാവാത്തതാണെന്നും എന്നാല്‍ ചില സമയത്ത് അത് പ്രേക്ഷകരില്‍ നിന്നും വേര്‍തിരിച്ചു നിര്‍ത്തുന്നുവെന്നും സോഷ്യൽ മീഡിയയിലൂടെ പുറത്തുവിട്ട പ്രസ്താവനയില്‍ നയന്‍താര കൂട്ടിച്ചേർത്തു. ഇപ്പോഴിതാ നയൻതാരയുടെ ഈ തീരുമാനത്തിൽ പ്രതികരിച്ചിരിക്കുകയാണ്
നടി ഖുശ്ബു. വളരെ നല്ല തീരുമാനമാണ് നയൻതാര എടുത്തതെന്നും സൂപ്പർസ്റ്റാർ എന്ന ടൈറ്റിൽ രജനി സാറിന് മാത്രം ചേരുന്നതാണെന്നും മാധ്യമങ്ങളോട് സംസാരിക്കവെ ഖുശ്ബു പറഞ്ഞു.
'നയൻതാരയെ എല്ലാവർക്കും നയൻതാര ആയിട്ടാണ് അറിയാവുന്നത്. ഞങ്ങളുടെ കാലത്ത് ആർക്കും പ്രത്യേക പട്ടം ഒന്നും നൽകിയിരുന്നില്ല. സൂപ്പർസ്റ്റാർ എന്ന ടൈറ്റിൽ ഒരാൾക്ക് മാത്രമാണ് ചേരുന്നത്, അത് രജനികാന്ത് ആണ്. തമിഴ്‌നാട്ടിൽ മാത്രമല്ല ലോകത്തിൽ എവിടെ പോയാലും സൂപ്പർസ്റ്റാർ എന്നാൽ അത് രജനി സാർ മാത്രമാണ്. ബാക്കിയെല്ലാവരെയും അത്തരം ടൈറ്റിലുകൾ നൽകാതെ പേര് ചൊല്ലി വിളിക്കുന്നതാണ് നല്ലത്. വളരെ നല്ല തീരുമാനമാണ് നയൻതാര എടുത്തത്', ഖുശ്ബു പറഞ്ഞു.
'നിങ്ങളെല്ലാം സ്നേഹത്തോടെ എന്നെ ലേഡി സൂപ്പര്‍സ്റ്റാര്‍ എന്ന് വിളിച്ചു. എനിക്ക് ഇത്രയും വലിയ ഒരു കിരീടം നല്‍കിയതിന് എല്ലാവരോടും കടപ്പെട്ടിരിക്കുന്നു. എന്നാല്‍ എന്നെ നയന്‍താര എന്ന് മാത്രം വിളിച്ചാല്‍ മതിയെന്ന് എളിമയോടെ അപേക്ഷിക്കുന്നു. കാരണം ഈ പേരാണ് എന്‍റെ ഹൃദയത്തോട് ചേര്‍ന്നുനില്‍ക്കുന്നത്. ഞാന്‍ ആരാണ് എന്നത് ആ പേര് പ്രതിനിധീകരിക്കുന്നുണ്ട്, നടി എന്ന നിലയ്ക്ക് മാത്രമല്ല, ഒരു വ്യക്തി എന്ന നിലയ്ക്കും' എന്നാണ് നയൻതാര പറഞ്ഞത്.
നേരത്തെ കമൽ ഹാസനും അജിത് കുമാറും ഉലകനായകനെന്നും തലയെന്നും തങ്ങളെ അഭിസംബോധന ചെയ്യരുതെന്ന് ആരാധകരോട് ആവശ്യപ്പെട്ട് രംഗത്തെത്തിയിരുന്നു. താരങ്ങളും ഔദ്യോഗിക സോഷ്യൽ മീഡിയ അക്കൗണ്ടുകളിൽ പ്രസ്താവന പങ്കുവെച്ചാണ് ആരാധകരെ ഇക്കാര്യം അറിയിച്ചത്.
Content Highlights: Khushbu talks about Nayanthara lady superstar title
