Get the latest news at
your fingertips!
Download our app now
LIVE TV
Search
ബോർഡർ-ഗാവസ്കർ ട്രോഫിയിലെ അഞ്ചാം ടെസ്റ്റിനുള്ള ഇന്ത്യൻ ടീമിൽ രോഹിത് ശർമയെ ഉൾപ്പെടുത്താൻ കഴിയില്ലെന്ന് നിലപാട് എടുത്തത് ഗൗതം ഗംഭീറെന്ന് റിപ്പോർട്ടുകൾ. സിഡ്നിയിൽ രോഹിത് ശർമയ്ക്ക് അവസാന ടെസ്റ്റ് മത്സരം കളിക്കാനുള്ള അവസരം ഒരുക്കണമെന്നായിരുന്നു ഇന്ത്യൻ ക്രിക്കറ്റ് അഡ്മിനിസ്ട്രേഷനിൽ നിന്നും ഗൗതം ഗംഭീറിന് ലഭിച്ച നിർദ്ദേശം. എന്നാൽ ഇന്ത്യൻ ടീമിന്റെ വിജയസാധ്യതകൾക്ക് എതിര് നിൽക്കാൻ കഴിയില്ലെന്നായിരുന്നു ഗംഭീറിന്റെ നിലപാട്. ഇതോടെ മുഖ്യസെലക്ടർ അജിത്ത് അഗാർക്കറിനെയും വൈസ് ക്യാപ്റ്റൻ ജസ്പ്രീത് ബുംമ്രയെയും അഞ്ചാം ടെസ്റ്റിൽ താൻ കളിക്കാനില്ലെന്ന് രോഹിത് അറിയിച്ചതായി ബിസിസിഐ വൃത്തങ്ങൾ പ്രതികരിച്ചു.
ബോർഡർ-ഗാവസ്കർ ട്രോഫിയിലെ അഞ്ചാം ടെസ്റ്റ് ജനുവരി മൂന്നിനാണ് ആരംഭിക്കുക. മോശം ഫോമാണ് രോഹിത് ശർമയുടെ ഇന്ത്യൻ ടീമിലെ സ്ഥാനത്തിന് ഭീഷണിയാകുന്നത്. 2024ൽ 14 ടെസ്റ്റുകൾ കളിച്ച രോഹിത് ശർമ 619 റൺസ് മാത്രമാണ് നേടിയത്. മാർച്ചിൽ ഇംഗ്ലണ്ടിനെതിരെയാണ് രോഹിത് ശർമയുടെ അവസാന സെഞ്ച്വറി. ബോർഡർ-ഗാവസ്കർ ട്രോഫിയിൽ മൂന്ന് ടെസ്റ്റുകളിൽ നിന്നായി 30 റൺസ് മാത്രമാണ് രോഹിത് ശർമയുടെ സമ്പാദ്യം. രോഹിത് ശർമയുടെ അഭാവത്തില്‍ അഞ്ചാം ടെസ്റ്റില്‍ ജസ്പ്രീത് ബുംമ്ര ഇന്ത്യൻ ടീമിന്റെ നായകനാവും.
ബോർഡർ-ഗാവസ്കർ ട്രോഫി നിലനിർത്താൻ പരമ്പരയിലെ അവസാന മത്സരത്തിൽ ഇന്ത്യയ്ക്ക് വിജയം നേടേണ്ടതുണ്ട്. നിലവിൽ 2-1ന് ഓസ്ട്രേലിയയാണ് മുന്നിൽ നിൽക്കുന്നത്. പരമ്പര സമനിലയിൽ ആയാൽ നിലവിലെ ജേതാക്കളായ ഇന്ത്യയ്ക്ക് ബോർഡർ-ഗാവസ്കർ ട്രോഫി സ്വന്തമാക്കാൻ കഴിയും. ജസ്പ്രീത് ബുംമ്ര നായകനായി തിരിച്ചെത്തിയാൽ പെർത്തിലെ വിജയം നേടാനാകുമെന്ന പ്രതീക്ഷയിലാണ് ഇന്ത്യൻ ടീം.
Content Highlights: Gautam Gambhir Rejected Request To Keep Rohit Sharma In Playing XI For 5th Australia Test
