LIVE TV
നിശ്ചിത 20 ഓവറിൽ റോയൽ ചലഞ്ചേഴ്‌സ് ബെംഗളൂരു ഉയർത്തിയ 180 റൺസ് വിജയലക്ഷ്യത്തിലേക്ക് ബാറ്റ് വീശിയ യുപി വാരിയേഴ്‌സും 20 ഓവറിൽ 180 ലെത്തിയതോടെയാണ് കളി സൂപ്പർ ഓവറിലേക്ക് നീണ്ടത്. ബെംഗളൂരുവിന് വേണ്ടി സൂപ്പർ ഓവർ എറിയാൻ കിം ഗാർത്ത് ആണ് എത്തിയത്. താരം മികച്ച രീതിയിൽ പന്തെറിഞ്ഞതോടെ ഏഴ് റൺസ് മാത്രമാണ് യുപി വാരിയേഴ്‌സിന് നേടാനായത്.
എന്നാൽ യുപി വാരിയേഴ്‌സിന് വേണ്ടി എറിയാനെത്തിയത് വെടിക്കെട്ട് ബാറ്റിങ്ങുമായി ടീമിനെ സൂപ്പർ ഓവർ വരെ എത്തിച്ച സോഫി എക്ലെസ്റ്റോൺ. താരം വെറും നാല് റൺസാണ് സ്‌മൃതി മന്ദാന-റിച്ച ഘോഷ് സഖ്യത്തിന് വിട്ടുകൊടുത്തത്. ഇതോടെ അവിശ്വനീയ ത്രില്ലറിൽ ആർസിബിയെ യുപി വാരിയേഴ്‌സ് തോൽപ്പിച്ചു.
നേരത്തെ സോഫി എക്ലെസ്റ്റോൺ അവസാനം തകർത്തടിച്ചതാണ് യുപി വാരിയേഴ്‌സിന് ആർസിബിയുടെ സ്കോർ എത്തിപ്പിടിക്കാൻ തുണയായത്. 19 പന്തിൽ ഒരു ഫോറും നാല് സിക്‌സറും അടക്കം 33 റൺസ് നേടി. സൈമ താക്കൂർ എട്ട് പന്തിൽ നിന്ന് ഒരു ഫോറും ഒരു സിക്‌സറും അടക്കം 14 റൺസ് നേടി മികച്ച പിന്തുണ നൽകി. ശ്വേതാ സെഹ്‌രാവത്ത് (31) , ദീപ്തി ശർമ( 25 ) കിരൺ നവ്ഗരെ (24) എന്നിവരാണ് തുടക്കത്തിൽ യുപി വാരിയേഴ്‌സിന് ഭേദപ്പെട്ട സംഭാവന നൽകിയത്.
നേരത്തെ എലീസ് പെറിയുടെ തകർപ്പൻ വെടിക്കെട്ടിലാണ് ആർസിബി വനിതകൾ ആറ് വിക്കറ്റ് നഷ്ടത്തിൽ 180 റൺസ് നേടിയത്. 56 പന്തിൽ മൂന്ന് സിക്സറുകളും ഒമ്പത് ഫോറുകളും അടക്കം 90 റൺസാണ് പെറി നേടിയത്. സ്‌മൃതി മന്ദാന ആറ് റൺസിന് പുറത്തായതിന് പിന്നാലെയായിരുന്നു ഓസീസ് താരത്തിന്റെ പ്രകടനം. താരത്തെ കൂടാതെ ഇംഗ്ലീഷ് താരം ഡാനി വ്യാറ്റ് 57 റൺസ് നേടി.
Content Highlights: wpl ;royal challengers bengaluru vs up warriors
