Get the latest news at
your fingertips!
Download our app now
LIVE TV
Search
ഇത്തവണ പോയ വർഷത്തെ ഐസിസി ഇയർ എൻഡ് ഏകദിന അവാർഡുകൾ പ്രഖ്യാപിച്ചപ്പോൾ പല ക്രിക്കറ്റ് ആരാധകർക്കും ആദ്യം ഒരു അന്താളിപ്പാണ് ഉണ്ടായത്. ഒരൊറ്റ ഇന്ത്യൻ താരങ്ങളുമില്ലാത്ത ഏകദിന ഇലവനെയാണ് ഇത്തവണ ഐസിസി പ്രഖ്യാപിച്ചത് എന്നതായിരുന്നു അതിൽ ആദ്യത്തേത്. കോഹ്‌ലിയിലും രോഹിത്തിലും തുടങ്ങി ജയ്‌സ്വാൾ, ഗിൽ, പന്ത്, രാഹുൽ, ബുംമ്ര തുടങ്ങി പേരുകേട്ട നിരയിൽ ആർക്കും ഈ ഇലവനിൽ ഇടം പിടിക്കാൻ പറ്റാതെ പോയത് എന്ത് കൊണ്ടാണെന്ന് പലരും അത്ഭുതപ്പെട്ടു.
പോരാത്തത് ഏകദിനത്തിലെ പ്ലേയർ ഓഫ് ദി ഇയർ ആയി പ്രഖ്യാപിക്കപ്പെട്ടതും പ്രധാന ക്രിക്കറ്റ് രാജ്യങ്ങളിൽ നിന്നല്ലാത്ത ഒരാളായിരുന്നു. അഫ്‌ഗാന്റെ ഓൾ റൗണ്ടർ താരമായ അസ്മത്തുള്ള ഒമർസായി. ആരാണ് ഇത്തവണ ഐസിസി പ്ലയെർ ഓഫ് ദി ഇയർ പുരസ്കാരം കരസ്ഥമാക്കിയ അസ്മത്തുള്ള ഒമർസായി. എന്താണ് മറ്റ് പ്രധാന താരങ്ങളെയെല്ലാം മറികടന്ന് ഒമർസായി പട്ടികയിൽ ഒന്നാമതെത്താനുള്ള കാരണം.
സ്വാഭാവികമായും ക്രിക്കറ്റ് ആരാധകർക്ക് ഉണ്ടാവാനിടയുള്ള ഈ രണ്ട് സംശയങ്ങൾക്കുമുള്ള ഉത്തരമാണ് ഇവിടെ പറയുന്നത്. ടി 20 ലോകകപ്പ് നടന്ന 2024 ൽ ഇന്ത്യ കൂടുതൽ എണ്ണം ഏകദിനങ്ങൾ കളിച്ചിട്ടില്ല എന്നതാണ് ഐസിസിയുടെ കലണ്ടർ വർഷത്തെ ഏകദിന പുരസ്കാരങ്ങളിലും ഇലവനിലും ഇന്ത്യയും ഇന്ത്യൻ താരങ്ങളും മാറ്റി നിർത്തപ്പെടാനുണ്ടായ പ്രധാന കാരണം. ആകെ മൂന്ന് ഏകദിനങ്ങൾ കളിച്ചപ്പോൾ മൂന്നിൽ രണ്ടിലും തോറ്റു, ഒന്ന് സമനിലയായി. ഇന്ത്യൻ താരങ്ങൾക്കും ഈ പരമ്പരയിൽ വലിയ നേട്ടങ്ങളൊന്നും ഉണ്ടാക്കാനായില്ല.
അതേ സമയം 2024 ൽ കളിച്ച അഞ്ച് ഏകദിന പരമ്പരകളിൽ നാലെണ്ണം ജയിച്ച ടീമാണ് അഫ്ഗാനിസ്ഥാൻ. അഫ്‌ഗാനിസ്ഥാനെ ഈ പരമ്പരകളിൽ മുന്നോട്ട് നയിച്ചതിൽ പ്രധാന താരമായിരുന്നു ഒമർസായി. കലണ്ടർ വർഷത്തിൽ ദേശീയ ടീമിലെ ഏറ്റവും ഉയർന്ന രണ്ടാമത്തെ റൺ സ്‌കോററായും ഏറ്റവും കൂടുതൽ വിക്കറ്റ് നേടിയ രണ്ടാമത്തെയാളായും ഒമാർസായി മാറി. റൺ വേട്ടയിൽ റഹ്മാനുള്ള ഗുർബാസാണ് അഫ്ഗാൻ താരങ്ങളിൽ മുന്നിൽ. ഗസൻഫറാണ് വിക്കറ്റ് വേട്ടയിൽ ഒന്നാമത്.
അഫ്ഗാനിസ്ഥാൻ ഓൾറൗണ്ടർ വർഷം മുഴുവനും ബാറ്റിലും പന്തിലും മികച്ച പ്രകടനമാണ് കാഴ്ചവെച്ചത്, 14 മത്സരങ്ങളിൽ നിന്ന് 52.12 ശരാശരിയിൽ 417 റൺസും 20.47 ബൗളിങ് ശരാശരിയിൽ 17 വിക്കറ്റും നേടി. ഈ വർഷത്തെ ആദ്യ ഏകദിനത്തിൽ തന്നെ 149 റൺസിന്റെ മിന്നും പ്രകടനവും താരം നടത്തിയിരുന്നു. ആവശ്യമായ സമയങ്ങളിൽ ബോൾ കൊണ്ടും നിർണായക സംഭാവനകൾ നൽകി.
അതേ സമയം അഫ്ഗാനിസ്ഥാൻ ക്രിക്കറ്റ് ടീമിൽ നിന്നും ഒമാർസായിയെ കൂടാതെ രണ്ട് താരങ്ങൾ കൂടി ഇത്തവണ ഐസിസിയുടെ ഏകദിന ഇലവനിൽ എത്തിയിട്ടുണ്ട് . ഓപ്പണർ റഹ്മാനുള്ള ഗുര്‍ബാസ്, ബോളർ ഗസൻഫറും. ഏതായാലും ചാംപ്യൻസ് ട്രോഫി അടുത്തിരിക്കെ പല രാജ്യങ്ങളും അഫ്‌ഗാന് മേൽ ടൂർണമെന്റ് ബഹിഷ്കരണ ഭീഷണി വരെ ഉയർത്തിയിരിക്കുന്ന സാഹചര്യത്തിൽ ഈ നേട്ടങ്ങൾ ഒരു ഊർജ്ജമാകും.
Content Highlights: Afghan cricket in 2024 ICC ODI AWARDS
