Get the latest news at
your fingertips!
Download our app now
LIVE TV
Search
രുവനന്തപുരം: വയനാട് ജില്ലയിലെ മുണ്ടക്കൈ ചുരൽമല ഉരുൾപൊട്ടൽ ദുരന്തബാധിതരുടെ പുനരധിവാസത്തിന് ഏറ്റെടുക്കുന്ന ഭൂമിക്ക് നഷ്ടപരിഹാരം അനുവദിക്കാൻ മന്ത്രിസഭാ യോഗം തീരുമാനിച്ചു. ടൗൺഷിപ്പ് നിർമ്മിക്കുന്നതിന് വൈത്തിരി താലൂക്ക് കൽപ്പറ്റ വില്ലേജിൽ ബ്ലോക്ക് 19 ൽ റീസർവ്വെ നമ്പർ 88/ 158, 88/159, 88/62 88/66, 88/137 എന്നിവയിൽപ്പെട്ട എൽസ്റ്റൺ എസ്റ്റേറ്റ് ഭൂമിയിലെ 64.4075 ഹെക്ടറാണ് ഏറ്റെടുക്കുന്നത്. ഇതിനായി വിശദവില വിവര റിപ്പോർട്ടിൽ പരാമർശിച്ച 26,56,10,769/രൂപ (ഇരുപത്തി ആറ് കോടി അൻപത്തിയാറ് ലക്ഷത്തി പതിനായിരത്തി എഴുന്നൂറ്റി അറുപത്തി ഒൻപത് രൂപ) മുഖ്യമന്ത്രിയുടെ ദുരിതാശ്വാസ നിധിയിൽ നിന്ന് അനുവദിക്കും.
വയനാട് മേപ്പാടി ഗ്രാമപഞ്ചായത്തിലെ ഉരുൾപൊട്ടലിൽ മാതാപിതാക്കൾ നഷ്ടപ്പെട്ട ഏഴ് കുട്ടികൾക്കും മാതാപിതാക്കളിൽ ഒരാൾ മാത്രം നഷ്ടപ്പെട്ട 14 കുട്ടികൾക്കും പഠനാവശ്യത്തിനുവേണ്ടി മാത്രം 10 ലക്ഷം രൂപ വീതം അനുവദിക്കും. 18 വയസ്സുവരെ തുക പിൻവലിക്കാൻ കഴിയില്ലെന്ന വ്യവസ്ഥയിൽ മുഖ്യമന്ത്രിയുടെ ദുരിതാശ്വാസ നിധിയിൽ നിന്നുമാണ് ധനസഹായം. വനിതശിശു വികസന വകുപ്പ് അനുവദിച്ച ധനസഹായത്തിന് പുറമെയാണിത്. തുക ജില്ലാ കളക്ടറുടെ അക്കൗണ്ടിൽ നിക്ഷേപിച്ച് പ്രതിമാസ പലിശ ബന്ധപ്പെട്ട കുട്ടിയുടെ രക്ഷകർത്താവിന് ഓരോ മാസവും നൽകുന്നതിന് വയനാട് ജില്ലാ കളക്ടറെ ചുമതലപ്പെടുത്തിയിട്ടുണ്ട്.
അതേസമയം, വയനാട് ടൗൺഷിപ്പ് പദ്ധതികളുടെ നടത്തിപ്പിനായി രൂപീകരിച്ച പദ്ധതി നിർവ്വഹണ യൂണിറ്റിൽ വിവിധ തസ്തികൾ അനുവദിച്ചു. അക്കൗണ്ട്സ് ഓഫീസർ, സിവിൽ എൻജിനീയർ എന്നീ തസ്തികകൾ സൃഷ്ടിക്കും. ഫിനാൻസ് & അക്കൗണ്ട്സ് ഓഫീസർ എന്ന തസ്തിക ഫിനാൻസ് ഓഫീസർ എന്ന് പുനർനാമകരണം ചെയ്യും. സ്റ്റാഫിന്റെ നിയമനം നടത്തുവാനുള്ള നടപടികൾ സ്വീകരിക്കുവാൻ വയനാട് ടൗൺഷിപ്പ് പ്രോജക്ട് സ്പെഷ്യൽ ഓഫീസർക്ക് അനുമതി നൽകും. പ്രോജക്ട് ഇംപ്ലിമെന്റേഷൻ യൂണിറ്റിന്റെ തലവനായി വയനാട് ടൗൺഷിപ്പ് പ്രോജക്ട് സ്പെഷ്യൽ ഓഫീസറെ ചുമതലപ്പെടുത്തും.
അതേസമയം ഉരുൾപൊട്ടൽ ദുരന്തബാധിതരുടെ പുനരധിവാസവുമായി ബന്ധപ്പെട്ട് ടൗൺഷിപ്പിൽ ഉൾപ്പെടുത്തുന്ന ഉപഭോക്താക്കളുടെ 2B ലിസ്റ്റ് അന്തിമപ്പട്ടിക പ്രസിദ്ധീകരിച്ചു. മേപ്പാടി പഞ്ചായത്തിലെ പത്താം വാർഡ് അട്ടമലയിൽ 19 പേരെയും പതിനൊന്നാം വാർഡ് മുണ്ടക്കയിൽ 38 പേരെയും പന്ത്രണ്ടാം വാർഡ് ചൂരൽമലയിൽ 16 പേരെയും ഉൾപ്പെടുത്തിയിട്ടുണ്ട്. അന്തിമ പട്ടികയിൽ ആകെ 73 വീടുകൾ ആണുള്ളത്. മുണ്ടക്കൈ ചൂരൽമല അട്ടമല എന്നീ മൂന്നു വാർഡുകളിലെ നോ ഗോ സോണിന് 50 മീറ്റർ പരിധിയിൽ ഉള്ള ഒറ്റപ്പെട്ട വീടുകൾ 2B ലിസ്റ്റിൽ ഉൾപ്പെടുത്തിയിട്ടുണ്ട്. മൂന്നു ലിസ്റ്റുകളിലുമായി ഉൾപ്പെട്ടിരിക്കുന്ന ഉരുൾപൊട്ടൽ ദുരന്തബാധിതരായ ആകെ ഗുണഭോക്താക്കളുടെ എണ്ണം 417ആണ്. ദുരന്തബാധിതരും ജില്ലാ കളക്ടറുമായി വയനാട് കലക്ടറേറ്റിൽ നടന്ന കൂടിക്കാഴ്ചയിൽ 238 അപ്പീൽ ലഭിച്ചെങ്കിലും അംഗീകരിച്ചത് മൂന്നെണ്ണം മാത്രമാണ്. ടൗൺഷിപ്പിൽ വീടുകൾ ലഭിക്കുന്നതിനായി സമ്മതപത്രം നൽകുന്നതുമായി ബന്ധപ്പെട്ട അന്തിമ പട്ടിക പ്രസിദ്ധീകരിക്കുന്നത് മാർച്ച് 24നാണ്.
Content Highlights :Mundakai Churalmala landslide; Cabinet to grant compensation for land acquired for rehabilitation
