LIVE TV
കൊൽക്കത്ത: പശ്ചിമബംഗാൾ നിയമസഭയിൽ മുഖ്യമന്ത്രി മമത ബാനർജിയും ബിജെപിയും തമ്മിൽ രൂക്ഷമായ വാക്പോര്. ഞാനൊരു ഹിന്ദുവാണെന്നും അതിന് ബിജെപിയുടെ സർട്ടിഫിക്കറ്റ് ആവശ്യമില്ലെന്നും മമത ബാനർജി പറഞ്ഞു. തൃണമൂൽ കോൺഗ്രസ് സർക്കാർ ഹിന്ദു വിരുദ്ധരാണെന്ന് പ്രതിപക്ഷ നേതാവ് സുവേന്ദു അധികാരി ആരോപിച്ചതിനെ തുടർന്നാണ് മമതയുടെ മറുപടി.
പുണ്യമാസമായ റംസാൻ മാസത്തിൽ മുസ്‌ലിം സമുദായത്തെ ബിജെപി ലക്ഷ്യമിടുകയാണെന്ന് മമത പറഞ്ഞു. വർഗീയ പ്രസ്താവനകൾ നടത്തി രാജ്യത്തിന്റെ സാമ്പത്തിക, വ്യാപാര തകർച്ചയിൽ നിന്ന് ശ്രദ്ധ തിരിക്കാൻ അവർ ശ്രമിക്കുകയാണ്. ഒരു വ്യക്തി ഹിന്ദുവോ സിഖോ ബുദ്ധമതമോ മുസ്ലീമോ ക്രിസ്ത്യാനിയോ പാഴ്‌സിയോ ആകട്ടെ. ഓരോ പൗരനും അവരുടെ വിശ്വാസം സ്വതന്ത്രമായി ആചരിക്കാൻ അവകാശമുണ്ട്. മുഖ്യമന്ത്രി എന്ന നിലയിൽ, എല്ലാവരെയും പരിപാലിക്കുക എന്നതാണ് എന്റെ ഉത്തരവാദിത്തമെന്ന് മമത ബാനർജി പറഞ്ഞു.
പശ്ചിമ ബംഗാളില്‍ ബിജെപി സര്‍ക്കാര്‍ അധികാരത്തിലെത്തിയാൽ മുസ്‌ലിം എംഎല്‍എമാരെ നിയമസഭയില്‍ നിന്നും പുറത്താക്കുമെന്നാണ് പ്രതിപക്ഷ നേതാവായ സുവേന്ദു അധികാരി പറഞ്ഞിരുന്നു. മുസ്‌ലിം എംഎൽഎമാരെ ശാരീരികമായി ബലം പ്രയോഗിച്ചുതന്നെ സഭയിൽ നിന്ന് പുറത്താക്കും. മുസ്‌ലിം ലീഗിന്റെ രണ്ടാം പതിപ്പ് പോലെ പെരുമാറുന്ന ഒരു വര്‍ഗീയ ഭരണകൂടമാണ് മമത സര്‍ക്കാരിന്റേത്‌ സുവേന്ദു അധികാരി പറഞ്ഞിരുന്നു. ഇതിന് പിന്നാലെയാണ് മമതയുടെ മറുപടി. 2026ൽ നടക്കാനിരിക്കുന്ന തിരഞ്ഞെടുപ്പിൽ ബംഗാളിലെ ജനങ്ങള്‍ അവരെ വേരോടെ പിഴുതെറിയുമെന്നും സുവേന്ദു അധികാരി പറഞ്ഞിരുന്നു. സുവേന്ദുവിന്റെ പരാമർശത്തിൽ വിമർശനവുമായി തൃണമൂൽ കോൺഗ്രസ് രംഗത്തെത്തിയിരുന്നു.
സഹ നിയമസഭാംഗങ്ങൾക്കെതിരെ ഇത്തരം വിദ്വേഷകരമായ ഭാഷ ഉപയോഗിക്കുന്നത് ഒരു തിരഞ്ഞെടുക്കപ്പെട്ട പ്രതിനിധിക്ക് ചേരുന്ന കാര്യമല്ലെന്ന് തൃണമൂൽ വക്താവ് കുനാൽ ഘോഷ് പറഞ്ഞു. പാർലമെന്റിലും സംസ്ഥാന അസംബ്ലികളിലും ചർച്ചകളും വാദങ്ങളും ഉണ്ടാകാം. എന്നാൽ മതത്തെ ഉയർത്തിക്കാട്ടുന്നതും ഒരു പ്രത്യേക സമുദായത്തിൽപ്പെട്ട എംഎൽഎമാരെ ലക്ഷ്യമിടുന്നതും ഭരണഘടനയുടെ തത്വങ്ങൾക്ക് വിരുദ്ധമാണ്. പ്രകോപനപരമായ പ്രസ്താവനയാണ് ബിജെപി നേതാവ് ഉപയോഗിച്ചിരിക്കുന്നതെന്നും കുനാൽ ഘോഷ് പറഞ്ഞു.
Content Highlights: Mamata Banerjee Against BJP
